Olíufélög virðast taka meira til sín

Olíufélögin virðast græða allt að sex krónum meira fyrir hvern seldan bensínlítra nú en þau gerðu að meðaltali í júlí í fyrra þegar olíuverð á heimsmarkaði var í hámarki.

Olíuverð á heimsmarkaði náði sögulegu hámarki síðastliðið sumar en hefur lækkað síðan, eins hefur staða krónu styrkst gagnvart dollara síðan. Olíufélögin virðast ekki bregðast við þessum heimsmarkaðslækkunum fyllilega með lækkuðu verði til neytenda. Í júlí kostaði olíutunna á heimsmarkaði 77 dollara og dollarinn stóð að meðaltali í 74 krónum, nú kostar tunnan 57 dollara á heimsmarkaði og dollarinn stendur í tæpum 70 krónum.

Samkvæmt upplýsingum frá FÍB var kostnaður olíufélaganna á hvern keyptan bensínlítra að meðaltali 44 krónur í júlí og meðalverð til neytenda 130,6 krónur. Í janúar var aftur meðalverð til olíufélaga 26,5 krónur hver lítri og þá þurftu neytendur að borga 111,7 krónur að meðaltali fyrir líterinn í sjálfsafgreiðslu. Samkvæmt útreikningum FÍB tóku því olíufélögin utan sérskatta á bensín 23 krónur á líterinn með virðisaukaskatti í júlí í fyrra en 29 krónur fyrir hvern lítra nú í janúar.

Þá vekur það athygli að þegar olíufélögin fóru að keppast um það í fyrra að breyta verðlagningu eftir verðsveiflum á heimsmarkaði urðu yfir 80 verðbreytingar á árinu en eru örfáar eftir áramót.