Áramótaheit borgarstjóra: Reykjavík verði herlaust svæði

Jón Gnarr borgarstjóri vill að Reykjavík verði yfirlýst herlaust svæði. Þetta kemur fram á Facebook síðu borgarstjórans þar sem hann segir að áramótaheit sitt í þetta skiptið sé að ná þessu í gegn, áður en hann lætur af embætti borgarstjóra í vor.

Með þessu á hann væntanlega við að herskip erlendra þjóða séu ekki velkomin lengur í hafnir borgarinnar og sama eigi við um herflugvélar á Reykjavíkurflugvelli.

„Ég hef þegar hafið vinnu við þetta“, segir borgarstjórinn og vitnar svo til orða John Lennon um að stríðið sé búið, „ef maður vill að það sé búið.“