Yfirmaður Smartbíla á teppið vegna brota

Kópavogsbær hefur boðað Gunnar Torfason, yfirmann hjá Smartbílum, á fund vegna kynferðisbrota sem tvær þroskaskertar konur hafa tilkynnt af hendi bílstjóra fyrirtækisins. Smartbílar sjá um ferðaþjónustu fyrir fatlaða í Kópavogi, Mosfellsbæ og Garðabæ. Maðurinn hafði unnið í hálft ár hjá fyrirtækinu.

Arna Schram, upplýsingafulltrúi Kópavogsbæjar, segir verkferla verða endurskoðaða vegna málanna. „Þegar velferðarsvið fær fyrra málið inn á sitt borð er því strax vísað til lögreglu og manninum er vikið til hliðar,“ segir hún. „Síðan lesum við um hitt málið í Fréttablaðinu sem átti sér stað í Mosfellsbæ og því töldum við ástæðu til að boða Gunnar á fund.“

Smartbílum barst bréf þann 8. mars þar sem greint var frá því að þroskaskert kona í Mosfellsbæ hefði orðið fyrir kynferðisofbeldi af hálfu bílstjóra fyrirtækisins. Manninum var þó ekki vikið úr starfi eða málið tilkynnt til lögreglu, því nokkrum dögum síðar var hann kærður fyrir að nauðga þroskaskertri konu í Kópavogi. Bæði atvikin áttu sér stað í bíl á vegum Smartbíla. Arna segir grafalvarlegt að ofbeldið í Mosfellsbæ hafi ekki verið tilkynnt yfirvöldum eða Kópavogsbæ.

Hvorki Mosfellsbær né Garðabær höfðu fengið vitneskju um nein brot er varða Smartbíla þegar Fréttablaðið hafði samband. Ásgeir Sigurgestsson, hjá fjölskyldusviði Mosfellsbæjar, segir enga tilkynningu um brotið sem átti sér stað í bænum hafa borist honum. Hann segir allt ferðaþjónustukerfi fyrir fatlaða vera í endurskoðun.

Bergljót Sigurbjörnsdóttir, félagsmálastjóri Garðabæjar, sagði að málið yrði skoðað í ljósi upplýsinganna, en engin mál hafi enn komið inn á hennar borð.

Hvorki náðist í Gunnar Torfason né Einar Valsson, yfirmenn hjá Smartbílum, í gær.