Von á nýrri tillögu um afturköllun aðildarumsóknar

Sigmundur Davíð Gunnlaugsson, forsætisráherra, á von á nýrri tillögu um afturköllun aðildarumsóknar Íslands að Evrópusambandinu snemma á þessu ári. Utanríkisráðherra fagnar því og segist vilja klára málið sem fyrst.

Samningaviðræður síðustu ríkisstjórnar og ESB um viðamestu og flóknustu kaflana, sjávarútvegs- og landbúnaðarmál voru ekki hafnar þegar hlé var gert á þeim, vorið 2013. Að öðru leyti voru þær ágætlega á veg komnar enda höfðu þær staðið í um 18 mánuði.

Sigmundur Davíð var gestur Sigurjóns M. Egilssonar í þættinum Sprengisandi á Bylgjunni í morgun, þar sem hann sagði að sú vinna sem lögð hefði verið í umsóknina og viðræðurnar sé lítils virði í dag. 

„Sú vinna heldur í rauninni ekki gildi sínu lengur. Bæði vegna breytinga hjá Evrópusambandinu, og það samræmist ekki stefnu stjórnvalda að fallast á allt sem að síðasta ríkisstjórn hefði verið tilbúin að fallast á. Af því leytinu til erum við á byrjunarreit,“ segir hann.

Ótækt sé þó að svo stórt mál sé látið hanga í lausu lofti. Mikilvægt sé að það sé borið undir Alþingi sem leiði það til lykta. Utanríkisráðherra hafi boðað það að koma með nýja tillögu um að slíta viðræðunum sem lögð verði fram á vorþingi.

Í samtali við fréttastofu í dag sagði Gunnar Bragi Sveinsson að hann fagnaði ummælum Sigmundar og að hans vilji væri að klára þetta mál sem fyrst.

Aðspurður um hvort fjölmenn mótmæli og undirskriftarsöfnun á síðasta ári hafi haft áhrif á málið segir hann það ekki hafa breytt neinu í afstöðu hans um að draga umsóknina til baka.