Vill skýringar vegna fyrirhugaðra greiðslna

Efnahags- og viðskiptanefnd ætlar að ræða arðgreiðslur tryggingafélaganna stuttlega á fundi sínum í dag. Frosti Sigurjónsson, formaður nefndarinnar, ætlar síðan að leggja til við nefndarmenn að málið verði tekið fyrir á sér fundi og óska eftir minnisblöðum frá Fjármálaeftirlitinu, Sam­keppnis­eftirlitinu og tryggingafélögunum sjálfum.

Greint hefur verið frá því að stjórnir tryggingafélaganna þriggja, VÍS, TM og Sjóvár, vilja greiða hluthöfum samtals 9,6 milljarða í arð vegna síðasta reikningsárs. Þá eru tillögur um endurkaup hlutabréfa upp á 3,5 milljarða.

Runólfur Ólafsson, formaður Félags íslenskra bifreiðaeigenda, sendi Bjarna Benediktssyni, fjármála- og efnahagsráðherra, bréf um helgina þar sem skorað er á hann að grípa til aðgerða til að stöðva „yfirvofandi gripdeildir tryggingafélaga úr sjóðum sem eru í eigu viðskiptavina þeirra“ eins og það er orðað í erindinu. FÍB segir að fjármunina eigi að taka úr bótasjóðum sem tryggingafélögin hafi safnað „með uppsprengdum iðgjöldum af ofáætluðum tjónum“.

Runólfur sagðist í gær ekki hafa fengið viðbrögð frá ráðherra við erindi sínu. Hann segist aftur á móti hafa fengið mikil viðbrögð við bréfinu. „Við höfum fengið bæði marga pósta og annað til félagsins. Og margar innhringingar. Þannig að fólki er almennt misboðið.“ Þótt fjármála- og efnahagsráðherra hafi ekki svarað brást Fjármálaeftirlitið við athugasemdum FÍB í gær.

Fjármálaeftirlitið segist hafa ríkar heimildir til þess að hlutast til um rekstur vátryggingafélaganna, en þó einungis til þess að hlutast til um að rekstur þeirra samræmist þeim lögum, reglum og öðrum viðmiðum sem um starfsemina gilda. Þannig sé það rangt sem fram kemur í umfjöllun FÍB að Fjármálaeftirlitið geti „skipað þeim að endurgreiða vátryggingatökum eign þeirra í bótasjóðunum eða nota fjármunina til að lækka iðgjöld næstu árin“.

Þá segir FME að íslensk vátryggingafélög séu rekin sem hlutafélög og eigi vátryggingatakar því ekki bótasjóð líkt og FÍB haldi fram. Þessa staðhæfingu dregur Runólfur í efa og segir þetta nýja skýringu hjá FME. „Ég veit ekki hvernig þeir réttlæta þá að bótasjóðirnir séu eign eigenda tryggingafélaganna. Allir forstjórar tryggingafélaganna sögðu hér fyrir 20 árum að bótasjóðirnir væru eign bótaþola og vátryggingataka,“ segir Runólfur.