Þetta kemur fram í tilkynningu sem Vísi barst rétt í þessu:
"Yfirstjórn X-ins 977 hefur tekið þessa ákvörðun í kjölfar formlegrar kvörtunar sem fyrirtækinu 365 barst frá nafntoguðum mannréttindafrömuði.
Kvörtunaraðili benti réttilega á að á vegg í hljóðveri útvarpsstöðvarinnar hanga siðareglur sem starfsmenn stöðvarinnar settu sér sjálfir á sínum tíma. Þar segir að siðareglunum sé ætlað að ýta undir heilindi, drengskap og feminísk viðhorf dagskrárgerðarmanna stöðvarinnar. Í g-lið 1. kafla segir enn fremur:
Starfsmaður skal halda í heiðri sterk feminísk viðhorf stöðvarinnar og kann hvers kyns kvenfyrirlitning að varða sektum, sem ákvarðaðar eru af framkvæmdastjórn stöðvarinnar hverju sinni, eða brottrekstri.
Kvörtunin barst í kjölfar viðtals sem var tekið í þættinum þann 22. nóvember síðastliðinn en þar talaði tónlistamaður fjálglega um kvenfólk og kynfæri. Kvörtunaraðilinn taldi manninn fá að viðra óviðeigandi hugmyndir sínar við glaðlegar og fullkomlega gagnrýnislausar undirtektir þáttastjórnenda, og enn fremur fengið að spila frumsamið lag þar sem hann lýsir þessum hugmyndum ennþá nánar.
X-ið 977 og dagskrárgerðarmenn Harmageddon harma þessi augljósu mistök. Harmageddon er útvarpsþáttur sem hefur það hlutverk að spyrja gagnrýnna spurninga. Í þessu tilviki þykir ljóst að ekki var staðið undir því hlutverki.
Umsjónarmenn Harmageddon munu af þessum sökum láta tímabundið af störfum og þar með gert að axla ábyrgð á óvönduðum vinnubrögðum."
Umrætt viðtal má heyra hér fyrir ofan og á útvarpsvef Vísis.
