Umfjöllun: Keflvíkingar höfðu betur í botnslagnum

Keflvíkingar unnu langþráðan og mikilvægan sigur, 1-0, gegn botnliði Fram í Pepsi-deild karla suður með sjó í kvöld. Eina mark leiksins gerði Arnór Ingvi Traustason þegar um hálftími var eftir af leiknum.

Fyrri hálfleikurinn hófst mjög svo rólega og fátt um fína drætti á upphafsmínútunum. Framarar voru ívið sterkari og virkuðu líklegir en heimamenn í Keflavík voru enn inn í búningsklefanum.

Eftir um tíu mínútna leik komust gestirnir í ákjósanlegt færi þegar Kristinn Ingi Halldórsson komst einn í gegnum vörn Keflvíkinga, átti aðeins eftir að koma boltanum framhjá Ómari Jóhannssyni í marki heimamanna en hann sá við honum.

Þegar tíu mínútur voru eftir af fyrri hálfleiknum fékk Almarr Ormarsson, leikmaður Fram, besta færi gestanna í fyrri hálfleik. Almarr slapp einn í gegn en aftur var Ómar Jóhannsson vel á varðbergi og forðaði Keflvíkingum frá því að lenda undir. Staðan var því 0-0 í hálfleik eftir virkilega leiðinlegan fyrri hálfleik.

Keflvíkingar komu ákveðnir til leiks í síðari hálfleik en Guðmundur Steinarsson, leikmaður Keflvíkinga, átti skot í stöng eftir nokkrar sekúndur. Það virtist vera einhver skjálfti í gestunum og liðið ekki að leika eins vel og í fyrri hálfleiknum.

Á 58. Mínútu komust heimamenn yfir með marki frá Arnóri Ingva Traustasyni, en hann fékk boltann við vítateig Framara eftir að varnarmaður gestanna hafði reynt að hreinsa boltanum út úr teignum með þeim afleiðingum að Arnór gat lagt boltann í netið.

Það er skemmst frá því að segja að fátt annað markvert gerðist það sem eftir lifði leiks og Keflvíkingar náðu að innbyrða gríðarlega mikilvægan sigur. Martröð Framara heldur áfram og útlitið vægast sagt orðið dökkt fyrir þá.

Keflavík 1 – 0 Fram1-0 Arnór Ingvi Traustason  (53.)

Skot (á mark): 8 – 6 (4-4)

Varin skot: Ómar 4 – 2 Ögmundur

Horn: 2 – 5

Aukaspyrnur fengnar:17– 11

Rangstöður: 1-0



Áhorfendur: 642

Dómari: Þórvaldur Árnason 8 - stóð sig virkilega vel.