Innlent

Tveggja ára settur út í frostið á sokkaleistum

Sveinn Arnarsson skrifar
Una Sigríður Jónsdóttir ásamt syni sínum Rúriki Pál Hallgrímssyni.
Una Sigríður Jónsdóttir ásamt syni sínum Rúriki Pál Hallgrímssyni. Mynd/Úr einkasafni
„Ég er bara svo undrandi á að þetta hafi yfirhöfuð átt sér stað,“ segir Una Sigríður Jónsdóttir. Tveggja ára sonur hennar var læstur úti í frosti á leikskólanum Kærabæ á Fáskrúðsfirði á miðvikudaginn.

„Ég ræddi við starfsmanninn eftir að þetta gerðist og þá var ekki að heyra mikla eftirsjá í orðum hennar. Þar spurði hún mig hvað ég hefði gert í þessum aðstæðum og að hún hefði nú gert þetta áður við annað barn,“ segir Una Sigríður.

Skýringarnar sem Una Sigríður segist hafa fengið voru þær að hegna hafi þurft barninu vegna hegðunar. Drengurinn hafi sömuleiðis verið settur út fyrir í uppeldisskyni.

„Barnið mitt var sem sagt að herma eftir öðru barni og fór ekki eftir fyrirmælum leikskólakennarans. Því ákvað leikskólakennarinn að grípa til þess ráðs að setja hann út í frostið án hlífðarfatnaðar til að kenna honum lexíu,“ vitnar Una Sigríður til þeirra skýringa sem henni voru gefnar.

Una ákvað að skrifa um atburðinn á Facebook-síðu sína um kvöldið. Viðbrögðin voru mjög hörð og í gær boðuðu skólayfirvöld hana á fund til að ræða saman.

„Það var svo ekki fyrr en í gær, eftir fund með leikskólastjóra og fræðslustjóra Fjarðabyggðar, að ég er beðin afsökunar og að allir hlutaðeigandi séu sammála um að þessi vinnubrögð hafi ekki verið í lagi,“ segir Una Sigríður.

Þóroddur Helgason, fræðslustjóri Fjarðabyggðar, segir málið hafa verið tekið fyrir strax í gærmorgun er bæjaryfirvöld heyrðu af því. Málið verði áfram í vinnslu til að tryggja að slíkt gerist ekki aftur.

„Við hörmum það sem gerðist og höfum beðið hlutaðeigandi aðila afsökunar á að þetta atvik hafi átt sér stað. Við munum í framhaldinu tryggja það að slíkt gerist ekki aftur og munum læra af þessu,“ segir Þóroddur. Hitastigið hafi verið í kringum frostmark. „Svona vinnubrögð viljum við ekki sjá á okkar leikskólum.“

Fréttin birtist fyrst í Fréttablaðinu




Fleiri fréttir

Sjá meira


×