Sykursjúkir útilokaðir frá líftryggingu

Einstaklingar við nærri fullkomna heilsu en greindir með sykursýki 1 eiga ekki möguleika á líf- og sjúkdómatryggingu hér á landi án þess að greiða 200% hærra iðngjald. Formaður sykursjúkra á Íslandi gagnrýnir að insúlínháðir séu strax útilokaðir frá líftryggingu.

Talið er að um 7000 þúsund Íslendingar séu greindir með sykursýki og glíma um 15% þeirra við insúlínháða sykursýki sem í daglegu tali er nefnt sykursýki 1.

Í gegnum tíðina hafa sykursjúkir ekki getað líf- og sjúkdómatryggt sig án þess að verja til þess umtalsverðum fjárhæðum. Félag sykursjúkra á Íslandi segir ástandið bagalegt sérstaklega fyrir ungt fólk með börn.

„Mér finnst þetta náttúrulega ekki réttlátt. Það hefur komið í ljós við rannsóknir að einstaklingur með sykursýki getur jafnvel verið við betri heilsu en sá sem er ekki með neinn skráðan sjúkdóm. Þetta er óréttlátt - ósanngjarnt að allir séu settir undir sama hatt,“ segir Sigríður Jóhannsdóttir, formaður Samtaka sykursjúkra á Íslandi.

Borga 200% hærri iðngjald fyrir líftryggingu
Tökum dæmi. 35 ára karlmaður sem reykir ekki greiðir árlega 17.380 krónur fyrir 10 milljón króna líftryggingu hjá íslensku tryggingafélagi. Kona greiðir 12.940 krónur miðað við sömu forsendur.

Einstaklingur á sama aldri með sykursýki 1 á möguleika á líftryggingu en þó gegn töluvert hærra iðngjaldi. Sé einstaklingurinn heilsuhraustur þá greiðir karlmaður um 52 þúsund krónur árlega fyrir sömu tryggingu. Kona í sömu stöðu greiðir tæp 38 þúsund. Verðmunurinn er um 200%.

„Fyrir ungt fólk með ung börn og miklar skuldir þá hlýtur þetta að skipta máli. Jafnmiklu máli og fyrir allt annað fólk sem vill kaupa sér líftryggingu,“ segir Sigríður sem vonast eftir breytingum.

„Það eru mál í gangi í Svíþjóð og Danmörku. Ef þau skila árangri þá vonast ég til að sama niðurstaða verði á Íslandi.“