Styrkir verkefni 5 fyrirtækja um 1,6 milljarða

Jarðhita- og vatnsaflsverkefni sem fimm íslensk fyrirtæki koma að í Rúmeníu fengu í vikunni styrk að jafnvirði samtals 1,6 milljarða króna úr Uppbyggingarsjóði EES.

Heildarumfang verkefnanna þriggja er um fjórir milljarðar króna. Verkefnin á sviði jarðhita eiga eftir að auka nýtingu hans í Rúmeníu um allt að 30 prósent.

Fyrirtækin sem um ræðir eru Mannvit, Íslenskar orkurannsóknir (Ísor), Iceland Geothermal Engineering, Landsvirkjun Power og Verkís. Mannvit og Ísor koma að stærsta verkefninu sem tengist nýtingu jarðvarma í rúmensku borginni Timisoara.

Icelandic Geothermal Engineering verður þátttakandi í jarðhitaverkefni í Oradea þar sem nýta á heitt vatn til upphitunar í borginni. Landsvirkjun Power og Verkís koma að lokum að uppbyggingu tveggja lítilla vatnsaflsvirkjana á svæðinu Somes-Tisa í Norður-Rúmeníu.

„Þetta er gríðarlega jákvætt fyrir okkur og skiptir máli vegna allra þeirra verkefna sem við vinnum nú við og tengjast jarðhitamálum í Mið-Evrópu. Við munum fara strax í undirbúning og gerum ráð fyrir að hefja framkvæmdir á síðasta fjórðungi þessa árs,“ segir Eyjólfur Árni Rafnsson, forstjóri Mannvits.

Í mars 2014 opnaði Uppbyggingarsjóður EES, áður Þróunarsjóður EFTA, fyrir umsóknir um styrki úr orkuáætluninni Rondine. Áætlunin fjármagnar verkefni sem stuðla að aukinni notkun endurnýjanlegrar orku í Rúmeníu.

Rondine bárust umsóknir vegna tíu verkefna og ákveðið var að styrkja fjögur. Orkustofnun hefur undanfarin fjögur ár tekið þátt í mótun og framkvæmd áætlunarinnar. Framlag Íslands til Uppbyggingarsjóðs EES nemur um 960 milljónum króna á ári.

Í Rúmeníu má finna yfir hundrað jarðvarmaveitur sem nýta jarðefnaeldsneyti. Stór hluti þeirra nýtir innflutt gas auk þess sem mikið er af vatnsafli sem ekki hefur verið virkjað í landinu.