Strembin staða fyrir útflutning lambakjöts

Síðustu 20 mánuði hafa rúmlega 4.400 tonn af lambakjöti verið flutt úr landi. Meðalverð allrar þeirrar framleiðslu er um 742 krónur kílóið. Verð á erlendum mörkuðum hefur hrunið síðustu misseri vegna erfiðra ytri skilyrða, svo sem gengisþróunar og lokunar markaða.

Þegar útflutningstölurnar eru skoðaðar nánar hjá Hagstofunni kemur í ljós að stærsti einstaki vöruflokkurinn eru frystir heilir og hálfir lambaskrokkar. Um það bil 1.250 tonn hafa farið utan á þessu tímabili frá janúar 2015 til loka október 2016. Meðalverðið á þeim er um 834 krónur á hvert kíló. Augljóst er að borgað er með útflutningnum.

Um 220 tonn af frystum lambalærum og lærissneiðum hafa einnig verið flutt út á þessu tímabili þar sem 880 krónur fást fyrir hvert kíló. Um 90 tonn hafa farið af ferskum lambalærum en þar fást um þúsund krónur fyrir hvert kíló enda mikil gæðavara.

Ágúst Andrésson, formaður Landssamtaka sláturleyfishafa, segir verð á erlendum mörkuðum hafa hrunið vegna styrkingar krónunnar og lokunar markaða. Nú sé staðan sú í Noregi, sem hefur verið að taka um 600 tonn árlega af lambakjöti, að umframbirgðir eru á markaði af lambakjöti. Því hefur verðið til Noregs lækkað mikið. Ekki sé búið að klára að semja um þau 600 tonn sem fari þangað úr þessari sláturtíð eins og tíðkast hefur undanfarin ár. „Staðan eins og hún er núna er nokkuð erfið en fyrst og fremst er styrking krónunnar að gera okkur mjög erfitt fyrir.“

Stórri afurðastöð hefur verið boðið verð í lambakjöt til útflutnings af haustslátrun 2016. Í útboðsgögnunum kemur í ljós slæm staða útflutnings á lambakjöti. Skrokkar í heilu sem fara til Noregs geta farið á um 623 krónur hvert kíló. Tilboðsverð á lambalærum til Bretlands er um 635 krónur en 480 krónur fyrir framparta. Heilir hryggir eru sendir til Spánar á 720 krónur hvert kíló svo dæmi séu tekin.

Sauðfjárbændur fá greiddar um 550 krónur fyrir hvert kíló afurða sem þeir leggja inn til slátrunar. Að auki fá margir sauðfjárbændur greiðslur frá hinu opinbera.

Svavar Halldórsson, framkvæmdastjóri Samtaka sauðfjárbænda, vildi ekki tjá sig um málið nema fá að sjá fyrirfram umfjöllun Fréttablaðsins í heild um málið.

Fréttin birtist fyrst í Fréttablaðinu