Strákarnir flýttu sér hægt í fyrri ferðinni | Myndband

Einar Kristinn Kristgeirsson og Brynjar Jökull Guðmundsson komust báðir í mark í fyrri ferð svigkeppninnar í Sotsjí í dag.

Einar Kristinn var fyrri til af Íslendingunum og kom í mark á 54,04 sekúndum og er 7,34 sekúndum á eftir efsta manni.

Einar skíðaði mjög öruggt niður brekkuna og hefði getað farið mun hraðar en vildi augljóslega frekar komast alla leið sem og tókst.

Brynjari Jökli urðu á smá mistök um miðja braut en hann komst engu að síður í mark á 56,85 sekúndum. Hann flýtti sér líka hægt eins og Einar Kristinn og eru þeir báðir neðarlega.

Mikil aföll urðu í fyrri ferðinni og náðu tugir keppenda ekki að klára. Brautin var nokkuð erfið viðureignar og því ágætlega gert hjá strákunum að komast alla leið.

Austurríkismaðurinn Mario Matt er í forystu eftir fyrri ferðina en hann kom í mark á 46,70 sekúndum. Andre Myhrer frá Svíþjóð náði næstbesta tímanum og Stefano Gross frá Ítalíu þeim þriðja besta.

Seinni ferðin hefst klukkan 16.10 og er í beinni útsendingu á Stöð 2 Sport og hér á Vísi.