Stjarna Stundarinnar okkar flytur til Bandaríkjanna

„Ég er bara einfaldlega að fara að snúa mér að öðru og framtíð mín mun væntanlega skýrast á næstu mánuðum,“ segir Björgvin Franz Gíslason leikari.

Björgvin hefur síðustu þrjú ár stjórnað Stundinni okkar á RÚV en hefur ákveðið að láta af störfum eftir þennan vetur. „Ég væri að ljúga ef ég segði að þetta væri ekki það skemmtilegasta sem ég hafi tekið mér fyrir hendur. En maður verður líka að þekkja sinn vitjunartíma og ég fann bara að minn tími var kominn. Það er svo skrítið hvernig maður finnur þetta,“ segir Björgvin.

Talsverð upphefð felst í því að vera falið að stjórna Stundinni okkar enda hefur þátturinn verið eitt vinsælasta barnaefnið frá fyrsta þætti árið 1966. En nú hefur Björgvin sem sagt ákveðið að hætta. „Sko, konuna mína langar til Ameríku í nám í fjölskyldu- og hjónabandsráðgjöf og ég mun að öllum líkindum elta hana. Þetta skýrist hins vegar á næstu mánuðum,“ segir Björgvin og það þarf næstum að tosa framhaldið upp úr honum með töngum. „Hún hefur verið að skoða skóla í borg sem er kaldari en Ísland, í Wisconsin. Ég spurði hana reyndar hvort hún gæti ekki hugsað sér eitthvert nám í Kaliforníu þar sem er aðeins hlýrra en besti skólinn er víst í Wisconsin. Frændfólk mitt á reyndar heima í Minneapolis sem er í klukkustundar fjarlægð þannig að það ætti ekki að væsa um okkur,“ bætir Björgvin við. Sjálfur sér hann það fyrir sér að vera heimavinnandi „húsmóðir“ fyrst um sinn. „Og svo er það nú einu sinni þannig að maður á sér alltaf gæluverkefni sem maður hefur ekki tíma til að sinna. Mig langar að skrifa meira og ætli ég reyni ekki að sinna því.“

RÚV hefur þegar auglýst eftir nýjum umsjónarmanni Stundarinnar okkar. Björgvin segir tímasetninguna með ráðnum hug, hann langi til að setja brotthvarf sitt inn í söguþráð Stundarinnar. Svo hafi menn líka viljað fá góðan tíma til að vega og meta umsóknir, finna hæfasta umsækjandann og skóla hann aðeins til. „Ég hvet alla sem hafa ástríðu fyrir þessu að sækja um því það er engu logið. Þetta er eitt skemmtilegasta starf sem ég hef tekið mér fyrir hendur.“

freyrgigja@frettabladid.is