Innlent

Smágos í gangi með nýju öskufalli

Sprengingar urðu enn í toppgíg Eyjafjallajökuls í nótt. Dökkur öskubólstur barst til himins og sást aska úr honum falla á jökulinn. Jarðvísindamenn segja að smágos sé í gangi eldfjallinu.

Yfirlýsingar um goslok í Eyjafjallajökli eru enn ótímabærar. Eftir nærri tveggja vikna hlé, þar sem aðeins sáust hvítir gufubólstrar stíga upp, jókst órói á ný síðastliðinn föstudag og enn meir á laugardag og sást svartur og dökkgrár mökkur af og til koma á ný upp úr gígnum samhliða því sem mælar sýndu óróapúlsa. Þetta gerðist einnig í nótt, öskusprengingar sendu dökkan mökk upp og fylgdi öskufall í næsta nágrenni gígsins.

Sigurlaug Hjaltadóttir, jarðeðlisfræðingur á Veðurstofunni, segir smágos í gangi. Þó eru engin merki um að ný kvika sé að berast djúpt að inn í eldfjallið heldur virðist þetta vera sprengingar í kviku efst í gosrásinni. Þetta er eitt og eitt púff, segir Sigurlaug. Ró hefur þó færst yfir eldstöðina síðustu klukkustundir og hafa engir skjálftar mælst í morgun.





Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×