Segja aðhaldstímabili í ríkisrekstri lokið

Viðskiptaráð Íslands fagnar áherslu á hraða niðurgreiðslu skulda og að hluta aukningar skatttekna sé skilað til baka í formi skattalækkana í nýjum fjárlögum. Hins vegar valda hratt vaxandi útgjöld áhyggjum, séu nýjustu launabreytingar meðtaldar segir ráðið fjárlögin tæplega geta talist hallalaus. Þetta kemur fram í umsögn Viðskiptaráðs um fjárlög 2016 til fjárlaganefndar Alþingis.

Í umsögninni fagnar Viðskiptaráðið afnám tolla á allar vörur aðrar en matvörur, ráðið telur einnig lækkun tekjuskatts einstaklinga og fækkun skattþrepa framfaraskref. Raunar er það mat ráðsins að ganga megi lengra við lækkun skatta. Viðskiptaráðið gerir hins vegar athugasemdir við skort á aðhaldi þegar kemur að launakostnaði (15 milljarðar króna aukning) og öðrum útgjöldum.

Ráðið hefur hins vegar áhyggjur af útgjöldum ríkisins. Í umsögninni segir að svo virðist sem aðhaldstímabili í ríkisrekstri sé lokið. Útgjaldaaukning ríkissjóðs nemur 27 ma. kr. á milli ára samkvæmt áætlun frumvarpsins, sem jafngildir um 4,9% hækkun. Ríflega helming aukningarinnar má rekja til hærri launakostnaðar. Auk vaxandi launakostnaðar marki fjárlagafrumvarpið stefnubreytingu þegar kemur að aðhaldi í opinberum rekstri. Ráðið gagnrýnir að stofnað sé til nýrra útgjalda sem nema 12 ma. kr. þar sem krafa um samdrátt útgjalda hjá ráðuneytum og stofnunum sé nú horfin. Þetta sé gert þrátt fyrir að efnahagsleg rök hnígi að því að auka aðhald í opinberum rekstri, ekki slaka á því, til að draga úr ofþenslu á því uppgangstímabili sem nú sé hafið hérlendis.

Ráðið hvetur stjórnvöld til að finna leiðir til að draga úr opinberum útgjöldum í frumvarpinu og vísar til þess að það hafi bent á ýmis tækifæri til að veita opinbera þjónustu með með hagkvæmari hætti í stærstu málaflokkunum eins og mennta-, velferðar-, heilbrigðis-, og innkaupamálum.