Sáttatillögu stúdenta hafnað af stjórn LÍN

„Þetta eru vonbrigði,“ segir María Rut Kristinsdóttir, formaður Stúdentaráðs Háskóla Íslands, sem í gær fundaði með stjórn LÍN um fyrirhugaðar breytingar á útlánareglum sjóðsins. Á fundinum hafnaði stjórnin sáttatillögum stúdenta.

„Við komum þarna inn með sparnaðartillögur upp á nær hálfan milljarð, til að koma til móts við stjórnina. Það var ekkert gert við þær og stjórnin sagðist ekki hafa tíma til að fara yfir þær,“ útskýrir María.

„Við fundum lausnir sem virkilega spara peninga fyrir Lánasjóðinn. Okkur finnst ekki gaman að leggja til sparnað við Lánasjóðinn, en við skiljum að ef er krafa um niðurskurð þá verðum við að mæta henni.“

Þannig verða kröfur um námsframvindu auknar úr 60 prósentum í 75 prósent af 30 eininga önn. Krafan fer því úr 18 einingum upp í 22 einingar til þess að stúdentar hljóti óskert námslán.

Stjórn LÍN bað fulltrúa stúdentaráðs um að víkja af fundinum á meðan tillögur stúdentaráðs voru yfirfarnar. „Þannig að pólitíski hluti stjórnarinnar var þeir sem sátu eftir,“ bætir María við.

Stúdentar fengu þrjá liði sinna tillagna í gegn. „Breytingarnar munu ekki snerta námsframvindukröfur fatlaðra eða öryrkja. Einnig munu þær ekki ná til þeirra sem eiga minna en 22 einingar eftir til útskriftar og eru á sinni síðustu önn. Í þriðja lagi verður núna litið til alls ársins, en ekki bara annarinnar. Það er samt bara frestun á vandamálinu,“ segir María að lokum.