Ríkri þjóð ber skylda að hjálpa þeim örsnauðustu

Hagræðingarhópur ríkisstjórnarinnar leggur til að framlög til þróunarmála verði endurskoðuð og nýleg hækkun framlaga til þeirra verði dregin til baka.

Össur Skarphéðinsson, alþingismaður og fyrrverandi utanríkisráðherra, segir tillöguna nöturlega og ef farið verði að henni séu Íslendingar að brjóta loforð og skuldbindingar sem Alþingi hafi gefið blásnauðustu þjóðum heims.

„Mér finnst þetta mjög sorgleg tillaga og hún er mjög miskunnarlaus. Ekki síst í ljósi þess að þó svo að Ísland hafi gengið í gegnum bankahrun fyrir fimm árum, þá erum við ennþá í hópi ríkustu þjóða heims,“ segir Össur.

Hann segist vera þeirrar skoðunar að ríkri þjóð beri siðferðisleg skylda til að láta af hendi rakna til að hjálpa þeim sem eru örsnauðastir í heiminum. 

Hann segir að þegar Alþingi hafi samþykkt að hækka framlög til þróunarmála fyrir einu og hálfu ári síðan hafi það verið gert einróma. Hann segir að meðal annars hafi núverandi fjármálaráðherra, Bjarni Benediktsson farið í stól á Alþingi og lýst því yfir að honum litist vel á hækkunina og að hún væri raunsæ.

Hann segir að Alþingi hafi meira að segja hækkað framlögin á þessum árum sem nú eru að ganga yfir.

Össur segir að honum þyki tillagan sorgleg. „Ekki síst í ljósi þess að þessi framlög okkar fara að stórum hluta í að styrkja fátækustu mæður í heiminum og börn þeirra. Með bólusetningum og með því að afla þeim vatns og mennta bláfátækar kornungar konur sem verða mæður mjög snemma í þessum löndum.“

Hann segir að í ljósi þess að okkar framlög séu  viðurkennd af mörgum þjóðum fyrir að vera sérstök að því leyti að þau renna til grasrótarsamtaka og til grasrótarhreyfinga á þessum svæðum sé hann ofandottinn. Það geri hann sorgbitinn að framsóknarflokkurinn sem kennir sig við félagshyggju, leggi nafn sitt við þessar tillögur.

Þróunaraðstoð skiptir máli

Össur segir að á síðustu árum hafi verið ákveðin breyting í því hvernig fé til þróunarlanda sé varið. Hann segir þátttöku heimamanna í ákvörðun skipta miklu og hún hafi aukist. Það sé minna um að það komi útlendar þjóðir, eins og til dæmis Íslands og segi hvað eigi að gera. Nú séu viðtakendur fjárframlagsins spurðir hvað sé mikilvægast.

Hann nefnir dæmi um starfið úti. Til dæmis hafi verið reistur spítali í Malaví og honum fylgi fæðingardeildir úti í frumskógunum. Þangað komi konur langar leiðir til þess að fæða. Þessar deildir eigi stóran þátt í að fæðingardauði hefur snarminnkað á þessum svæðum.

Hann minnir á að öll þróunaraðstoð skipti máli og þar sé Úganda gott dæmi. En Úganda hafi með þróunaraðstoð ýmissa landa náð að þokast upp fyrir fátæktarlínuna.