Ráðist á konu í klefa Laugardalslaugar

Guðrún Ósk Leifsdóttir endaði uppá spítala eftir erfiða lífreynslu í Laugardalslaug í gær. Kona á fertugsaldri kallaði hana ljótum nöfnum og barði hana áður en hún hljóp á brott. Leitar lögregla nú konunnar. Pressan sagði frá málinu í dag.

„Konan horfir á mig og blæs út á sér kinnarnar og leikur súmóglímukappa. Hún byrjar svo að kalla mig feita og segir mér að passa mig að springa ekki úr fitu,“ segir Guðrún Ósk í viðtali við Vísi. 

Guðrún lét þetta ekki á sig fá, lét sem vind um eyru þjóta og virti konuna ekki viðlits. Konan virðist hafa reiðst við það, hækkað róminn og nánast öskrað á Guðrúnu. Guðrún ákvað að tala við sundlaugarvörðinn sem bað konuna um hætta dónaskapnum, ella skyldi hún fara úr lauginni.

„Konan hlustar ekkert á manninn, rýkur uppúr, hleypur að mér og öskrar á mig. Hún kallaði mig feita og ógeðslega,“ segir Guðrún.

Stuttu síðar fór Guðrún úr lauginni og sá að konan var inni í búningsklefanum.

„Konan gengur að mér í sturtunni og heldur áfram. Ég horfi í augun á henni og segi henni að þetta sé ekki hennar mál og bið hana um að hætta.“

Guðrún fór og ræddi við starfsmenn í klefanum og sagði þeim frá stöðu mála. Þá kýldi konan Guðrúnu í kviðinn og hljóp svo á brott.

„Mér líður ekki vel en maður verður bara að gera sitt besta og komast í gegnum þetta eins og annað. Þetta er aldrei þægilegt fyrir sálina.“

Guðrún var með mikla kviðverki, var óglatt og ældi blóði og leitaði því læknisaðstoðar um kvöldið. Hún greindist með bólgur í maga og þarf að taka því rólega næstu daga. Guðrún hefur þegar kært og er málið í rannsókn lögreglu. Lögregla hefur fengið upptökur af atvikinu og leitar nú konunnar.