Nýr lögreglustjóri: Vill sjá nýjar áherslur í borginni

Sigríður Björk Guðjónsdóttir var í gær skipuð lögreglustjóri á höfuðborgarsvæðinu, fyrst kvenna.

„Þetta leggst mjög vel í mig,“ segir Sigríður. „Það er alltaf gaman að taka við nýrri stofnun, kynnast fólkinu og finna hvar hægt er að gera betur.“

Sigríður, sem hefur verið lögreglustjóri á Suðurnesjum frá árinu 2009, tekur við af Stefáni Eiríkssyni sem hefur verið ráðinn í starf sviðsstjóra velferðarsviðs Reykjavíkurborgar. Hún segir nýjar áherslur alltaf fylgja ráðningu nýs fólks.

„Ég myndi vilja sjá einhverjar af þeim áherslum sem við höfum staðið fyrir á Suðurnesjum í höfuðborginni, eins og áherslur á heimilisofbeldi,“ segir Sigríður. „En það er of snemmt að segja eitthvað afgerandi með það.“

Ólafur Helgi Kjartansson sem hefur verið sýslumaður á Selfossi tekur við starfi Sigríðar Bjarkar á Suðurnesjum en Kjartan Þorkelsson, sýslumaður á Hvolsvelli, fer í starf hans.

Samkvæmt nýjum lögum verður lögregluumdæmum fækkað úr 15 í níu um næstu áramót. Tvö embætti verða auglýst á næstu dögum, embætti lögreglustjóra á Vestfjörðum og í Vestmannaeyjum. Hanna Birna Kristjánsdóttir segir að með fækkun embættanna verði þau öflugri og yfirbygging minni.