FÖSTUDAGUR 28. NÓVEMBER NÝJAST 10:45

Tryllt stemning á tuttugustu hćđ

LÍFIĐ

Nokkurra klukkustunda fyrirvari yrđi á eldgosi

Innlent
11:37 18. ÁGÚST 2014
Magnús Tumi Guđmundsson og skjálftavirknin á Vatnajökli.
Magnús Tumi Guđmundsson og skjálftavirknin á Vatnajökli.

Jarðvísindamenn telja að sjá megi með nokkurra klukkustunda fyrirvara ef eldgos hefst á skjálftasvæðinu í Vatnajökli. Sterkasti skjálftinn í þessari hrinu varð í nótt og mældist fjögur stig.

Skjálftinn varð í grennd við Kistufell í norð-vestanverðum jöklinum. Hann fannst meðal annars á Akureyri. Ekki sjást þó merki um að kvika sé að leiðinni upp á yfirborðið. Þrátt fyrir að allir skjálftar sem hafa mælst eftir stóra skjálftann í nótt séu mun minni virðist ekkert lát vera á hrinunni að sögn Magnúsar Tuma Guðmundssonar, prófessors í jarðeðlisfræðum.

„Það eru nú lítil merki um að það sé að draga úr þessu. Við fengum stærsta skjálftann í nótt þannig að við verðum bara að bíða og sjá hvernig þetta þróast. Það er augljóslega kvika á hreyfingu,“ segir Magnús Tumi.

Hann segir engin merki þess að hreyfingar séu að leita nær yfirborðinu.

„Það er ekki að sjá eða það skilst mér á þeim sem hafa verið að skoða, engin merki um óróa eða að skjálftarnir séu að færast upp á við,“ segir Magnús Tumi. Fyrst og fremst sé um innskotavirkni að ræða og engin merki um eldgos að svo stöddu.

„En það er auðvitað ekki hægt að útiloka það. Maður myndi reikna með nokkurra klukkustunda fyrirvara.“

Frá miðnætti til klukkan sex í morgun höfðu um 250 skjálftar mælst við Bárðarbungu og Kistufell. Jarðvísindamenn flugu undir kvöld í gær yfir svæðið í þyrlu Gæslunnar til að meta aðstæður. Það ræðst svo á fundi Almannavarna, sem nú stendur, hvort svæðið verður aftur skoðað úr lofti í dag.

Síðustu sjö ár hefur virkni í Bárðarbungu aukist jafnt og þétt. Í kjölfar gossins í Grímsvötnum árið 2011 datt hún  tímabundið niður en fór fljótlega að aukast aftur. Skjálftahrina varð á svæðinu í maí í vor en hún var mun minni en hrinan núna er þegar orðin.

Óvissuástand er enn í gildi og útiloka Almannavarnir ekki að atburðarrásin  geti leitt til eldgoss undir jöklinum, með tilheyrandi flóðum. Þess vegna eru nokkrir hálendisvegir norðan Vatnajökuls enn lokaðir.


Deila
Athugiđ. Allar athugasemdir eru á ábyrgđ ţeirra er ţćr rita. Vísir hvetur lesendur til ađ halda sig viđ málefnalega umrćđu. Einnig áskilur Vísir sér rétt til ađ fjarlćgja ćrumeiđandi eđa ósćmilegar athugasemdir.

 

MEST LESIĐ

  • Nýjast á Vísi
  • Mest Lesiđ
  • Fréttir
  • Sport
  • Viđskipti
  • Lífiđ
Forsíđa / Fréttir / Innlent / Nokkurra klukkustunda fyrirvari yrđi á eldgosi
Fara efst