Nánast öll börn í leikskólum borgarinnar í heilsdagsvistun

Leikskólaplássum sem í boði eru í Reykjavík hefur fjölgað um 19 prósent frá árinu 2000. Hjá borginni hefur þeim fjölgað um 11,4 prósent, úr 5.240 plássum í 5.837 pláss í ár. Þegar sjálfstætt starfandi skólum er bætt við hefur plássum fjölgað úr 5.670 árið 2000 í 6.750 í ár. Fréttablaðið leitaði upplýsinga hjá Reykjavíkurborg um þróunina í leikskólamálum.

Ýmislegt forvitnilegt kemur í ljós þegar rýnt er í tölurnar. Þar má til dæmis sjá að plássum hjá sjálfstætt reknum leikskólum fækkaði á milli áranna 2011, þegar þau voru flest, og 2012. Plássum á einkareknu skólunum hefur þó fjölgað um 12,3 prósent frá árinu 2000.

Þegar tölur Hagstofu Íslands eru skoðaðar sést að börn á aldrinum tveggja til fimm ára í Reykjavík voru 6.624 árið 2000 en í ár eru þau 6.684. Það er fjölgun upp á tæpt prósent, sem er örlitlu minna en íbúafjölgun alls á tímabilinu.

Börnum sem njóta heilsdagsvistunar, sjö klukkustundir á dag eða lengur, hefur fjölgað mikið á tímabilinu. Árið 2000 voru um 70 prósent barna í slíkri vistun en í ár eru þau 97 prósent. Það þýðir að nær öll börn á leikskólum í dag eru í heilsdagsvistun. Hvort það er vegna aukins vinnutíma foreldra eða ekki skal ósagt látið.

Hildur Björk Svavarsdóttir, deildarstjóri hjá skóla- og frístundasviði borgarinnar, segir þetta þýða að mun fleiri dvalarstundir verði til í leikskólanum, en það er sá tími sem barn dvelur í leikskólanum.

"Sem dæmi um það voru 3.670 börn með heilsdagsvistun árið 2000, sem þýðir um 30.000 dvalarstundir, en 5.660 árið 2011, sem eru um 45.000 dvalarstundir. Framboð á þjónustu hefur því aukist meira en sem nemur fjölda plássa, þar sem lengd hvers pláss hefur einnig aukist."

Fréttablaðið fékk ekki kostnaðartölur við leikskólana nema frá árinu 2007. Á þeim tíma hafa framlög borgarinnar til þeirra aukist úr 7,3 í 10 milljarða.

kolbeinn@frettabladid.is