Innlent

Morfís og mormónar í hættu eftir harðan árekstur á Reykjanesbraut

Hulda Hólmkelsdóttir skrifar
Sindri Blær í hlutverki sínu.
Sindri Blær í hlutverki sínu. mynd/Aðsend
Sindri Blær Gunnarsson, 17 ára drengur úr Hafnarfirði, er annar þeirra sem lenti í hörðum árekstri á Reykjanesbraut nálægt Kaplakrika á mánudaginn þar sem tveir bílar skullu saman. Áreksturinn varð rétt fyrir klukkan tólf eftir að annar bílinn ók yfir á hinn vegarhelminginn.

Afleiðingarnar urðu þær að bíllinn sem Sindri Blær var í hafnaði utan vegar. Hann hlaut við áreksturinn nokkuð alvarlegt beinbrot og gert er ráð fyrir að hann verði fimm til sex mánuði að ná sér að fullu. Hinn aðilinn mun ekki vera alvarlega slasaður.

Sindri Blær stundar nám við Flensborgarskóla og er þar virkur í félagslífi skólans. Meðal annars fer hann með annað aðalhlutverkanna í uppfærslu skólans á söngleiknum Mormónabók og þá er hann einnig í ræðuliði skólans, sem keppir til undanúrslita í Morfís í næstu viku.

Þakklát að ekki fór verr

„Sindri er mikið hæfleikabúnt og vinamargur og því gott að geta látið vita af því að Sindri er ekki í lífshættu en hlaut alvarlegt beinbrot og það mun taka nokkurn tíma fyrir hann að ná sér að fullu. Það eru stór skörð sem að þarf að fylla þangað til,” segir Björk Jakobsdóttir, leikkona og leikstjóri Mormónabókar, í samtali við Vísi.

„Tvær sýningar voru áætlaðar um helgina en því miður verður að fella föstudagssýninguna niður en við munum sýna á sunnudaginn.“

Aðstoðarleikstjórinn Óli Gunnar mun hlaupa í skarðið fyrir Sindra svo hægt sé að sýna þrjár sýningar í viðbót, en Björk segist vona að hægt sé að taka aukasýningar þegar Sindri hefur náð sér að fullu.

„Sindri er einnig í morfísliði Flensborgar sem er komið í undanúrslit og keppir í næstu viku. þar eru vinir hans á hliðarlínunni til að stíga inn fyrir hann. Ef að hann nær ekki að vera með þar í næstu viku þá vonandi getur hann verið með á úrslitakvöldinu,“ segir Björk.

„Við erum bara öll gríðarlega þakklát að ekki fór verr.“


Tengdar fréttir




Fleiri fréttir

Sjá meira


×