Minecraft og Raspberry Pi í samstarf

Góðgerðarsamtökin Raspberry Pi Foundation, framleiðandi samnefndrar smátölvu, hafa tekið höndum saman við tölvuleikjafyrirtækið Mojang. Fyrirtækið er hvað frægast fyrir tölvuleikinn vinsæla Minecraft.

Höfuðáhersla Raspberry Pi Foundation er að vekja áhuga ungs fólks á forritun. Því þótti tilvalið að kynna undraheim kóðunar í gegnum Minecraft.

Rétt eins og smátölvan knáa hefur Minecraft vakið gríðarlega athygli. Leikurinn byggir á sýndaheimi þar sem spilurum er gefið færi á að skapa sinn eigin heim með því að raða saman mismunandi hráefnum.

Sérstök útgáfa af Raspberry Pi tölvunni fer í sölu á næstu vikum og mun hún innihalda viðhafnarútgáfu af Minecraft. Þá munu einnig fylgja leiðbeiningar þar sem undirstöðuatriði forritunar eru kennd.

Í myndbandinu hér fyrir ofan má sjá tölvuleikinn Minecraft spilaðann á Raspberry Pi.