Lögmenn sagðir nota handrukkara í störfum sínum

„Þetta er meinsemd sem þarf að ræða en hefur ekki farið hátt,“ segir Sævar Jónsson, lögmaður og eigandi lögmannsstofu, en hann segir staðreynd að innan lögmannastéttarinnar þrífist lítill hópur lögmanna sem beiti fyrir sig misindismönnum eða svokölluðum handrukkurum til að hafa áhrif á framgang mála.

„Þessir lögmenn hafa leiðst inn á þá braut að nýta sér ógnanir misindismanna og beita einstaklinga hótunum um líkamlegt ofbeldi eða skemmdarverk geri þeir ekki eins og þeim er sagt.“

Á lögmannsstofu Sævars kom slíkt atvik upp fyrr á þessu ári en þá komu menn á vegum lögmanna sem beittu sér gegn starfsfólki stofunnar í þeim tilgangi að fá starfsmenn ofan af því að halda áfram með tiltekið mál. Starfsmönnum var ógnað með óbeinum skilaboðum.

„Þannig koma þeir á starfsstöðvar með bein eða óbein skilaboð til starfsmanna. Þeir eru til dæmis notaðir til að innheimta kröfur eða til að þvinga það fram að lögmenn hætti með mál en þá hafa þeir sem senda misindismennina hagsmuni af málinu sem lögmenn.“

Sævar segir að það verði að vekja athygli á slíkum málum og vill meina að slíkt sé á vitorði margra innan stéttarinnar.

„Þetta má ekki viðgangast, sérstaklega þegar lögmenn beita sér í slíkum málum gegn kollegum sínum,“ segir Sævar og bætir við að lögmenn eigi að vera málsvarar réttlætis og eigi að efla rétt og hindra órétt.

Sævar segir mikilvægt að allt slíkt ofbeldi sé kært til lögreglu eða vísað til lögmannafélagsins.

„Reglan hjá okkur er sú að taka mjög hart á þessu og tilkynna öll slík brot.“

Samkvæmt upplýsingum frá úrskurðarnefnd lögmanna er eitt mál á borði nefndarinnar þar sem kvartað er yfir því að lögmaður hafi falið ólöglærðum manni að innheimta reikninga.

„Ef rétt reynist og lögmenn eru að beita misindismönnum til að setja fram hótanir í því skyni að ná fram markmiðum er það grafalvarlegt mál. Valdið til að kveða á um það hvað sé sannað í málunum er hjá úrskurðarnefndinni sem og valdið til að ákveða afleiðingar þess,“ segir Reimar Pétursson, formaður Lögmannafélags Íslands.

Hann bætir við að slík háttsemi sé svo alvarlegt brot að það hljóti að koma til álita að svipta menn réttindunum.

Fréttin birtist upphaflega í Fréttablaðinu