Lin biður fjölmiðla um að gefa ættingjum sínum í Taívan andrými

Jeremy Lin átti enn einn stórleikinn í nótt í sigri New York Knicks á meisturum Dallas Mavericks. Í viðtölum að leik loknum bað Lin fjölmiðla um að sýna nærgætni gagnvart ættingjum sínum í Taívan þar sem ríkir mikið fjölmiðlafár vegna frammistöðu hans að undanförnu.

„Ég elska fjölskyldu mína og elska ættingja mína," sagði Lin þegar hann var spurður um ömmu sína í Taívan. Hún virðist vera orðin að stórstjörnu í landinu ef marka má spurningu kínversks sjónvarpsfréttamanns á blaðamannafundinum.

„Ég hef eina bón til fjölmiðla í Taívan. Að gefa ættingjum mínum þar í landi andrými því þau komast ekki til vinnu vegna ágengra fjölmiðla og fólks sem eltir þau," sagði Lin og bað um að friðhelgi þeirra yrði virt.

Lin hefur unnið hug og hjörtu körfuknattleiksáhugamanna um allan heim með óvæntri frammistöðu sinni í stöðu leikstjórnanda Knicks. Þá virðist hógværð hans og framkoma utan vallar ekki síður falla í góðan jarðveg almennings og fjölmiðlamanna.