Krossmaður kannast ekki við ásakanir

„Ég kannast ekki við þessar ásakanir," segir starfsmaður trúfélagsins Krossins, Björn Ingi Stefánsson, en Pressan.is greinir frá því að óskilgreindur hópur kvenna hafi borið alvarlega ásakanir á hendur Gunnari Þorsteinssyni, leiðtoga safnaðarins.

Í frétt Pressunnar segir að Björn Ingi eigi að hafa komið á sáttafundum á milli Gunnars og kvennanna sem um ræðir. Þegar Vísir hafði samband við Björn sagðist hann ekki kannast við að hafa miðlað málum með þeim hætti sem lýst er í Pressunni.

Jónína Benediktsdóttir, athafnakona, hafði áður varað við því að sögusagnir væru farnar að kvisast út um Gunnar til þess að koma höggi á hana sjálfa vegna bókar sem hún gaf út á dögunum.

Þá var haldinn samverufundur hjá Krossinum fyrir nokkrum vikum, sem var oft nefndur neyðarfundur í fjölmiðlum, en þar upplýsti Gunnar söfnuð sinn um að alvarlegar sögusagnir væru komnar á kreik.

Björn Ingi segir Gunnar ekki hafa útskýrt á samverufundinum hvaða sögusagnir um væri að ræða.

Aðspurður hvort Björn Ingi kannaðist við ásakanirnar sem Pressan ber á borð svaraði hann: „Ég kannast ekki við þessar ásakanir. Þetta er hið undarlegasta mál."

Ekki náðist í Gunnar sjálfan né eiginkonu hans, Jónínu við vinnslu fréttarinnar.