Katrín vill bandalag vinstrimanna í sveitarstjórnarkosningunum í vor

Katrín Jakobsdóttir, formaður Vinstri grænna, segir stemningu fyrir því innan VG að flokkar á vinstri væng stjórnmálanna hefji samstarf eða myndi kosningabandalög fyrir sveitarstjórnarkosningarnar næsta vor. Ályktun hafi verið samþykkt um þetta á flokksráðfundi flokksins hinn 18. ágúst.

„Ég heyri þetta víða í minni hreyfingu og raunar miklu víðar,“ segir Katrín. Samstarf um þetta verði að ráðast af aðstæðum á hverjum stað fyrir sig. Hún viti hins vegar til þess að þetta sé til umræðu á nokkrum stöðum á landinu. Annaðhvort með yfirlýsingu um samstarf að loknum kosningum eða með kosningabandalagi.

Tvístruðust í síðustu kosningum

„Ég hef alltaf verið málsvari þess að vinstrimenn vinni saman. Í ljósi þess hvaða ríkisstjórn er við völd tel ég að það skipti máli að fólk á þessum væng stjórnmálanna horfi til þess hvernig það geti sem mest og best unnið saman. Við sáum í síðustu kosningum hvernig þessi hópur tvístraðist mjög mikið, þannig að ég er fylgjandi því að það sé skoðað hvernig við getum átt samstarf, “ segir Katrín.

Á Eyjunni í gær var Katrín nefnd sem leiðtogaefni slíks samstarfs.

„Það hafa margir komið að máli við mig en ekki um þetta,“ segir Katrín sem kveður mikilvægara að einbeita sér að sveitarstjórnarkosningunum.

Skynjar áhyggjur

„Ég skynja áhyggjur fólks af núverandi stjórnarstefnu og hún er afleiðing þess að burðarflokkur jafnaðarmanna veiktist í síðustu kosningum og afl umbótasinnaðs fólks tvístraðist,“ segir Árni Páll Árnason, formaður Samfylkingarinnar. Lausnin sé að efla og styrkja burðarflokk jafnaðarmanna.

„Við getum gert það í samstarfi við aðra flokka og viljum að sjálfsögðu að sem flestir komi til stuðnings þeirri hugmynd,“ segir Árni Páll.

Guðmundur Steingrímsson, formaður Bjartrar framtíðar, segir þessi mál ekki hafa verið mikið rædd innan hennar. Hann reikni með að flokkurinn sem skilgreini sig sem frjálslyndan miðjuflokk, einbeiti sér að sjálfstæðum framboðum. Guðmundur segist ekki vilja útiloka neitt þótt hann telji ólíklegt nú að Björt framtíð tæki þátt í bandalagi sem þessu.