Ísland er ögn minna en talið hefur verið

Eyjan Ísland er lítið eitt minni en áður var talið og miðja landsins hefur færst um 120 metra, með endurmælingum Loftmynda ehf. á strandlínu Íslands sem er nýlokið.

Niðurstaða mælinganna er að Ísland er 102.775 ferkílómetrar að stærð. Þessar nýju mælingar gefa því nákvæmari niðurstöðu en eldri mælingar, en samkvæmt upplýsingum Landmælinga Íslands hefur Ísland hingað til verið talið 103.000 ferkílómetrar.

Mælingarnar eru gerðar eftir háupplausna loftmyndum sem fyrirtækið hefur tekið af allri strandlínu landsins undanfarin ár. Með þessari aðferð er hægt að mæla stærð Íslands nákvæmar en hægt hefur verið áður, auk þess sem einfaldara verður að endurmæla strandlínuna síðar og kortleggja þannig breytingar á henni. Eldri upplýsingar um stærð landsins hafa verið byggðar á misgömlum og oft ónákvæmum gögnum.

Heildarlengd strandlínu Íslands er samkvæmt þessari nýju mælingu 6.542,4 kílómetrar. Við þessar endurmælingar var einnig reiknuð út ný miðja Íslands sem færist frá því sem áður hefur verið talið um 120 metra.