Inspired by Iceland skilaði 34 milljarða tekjum í fyrra

Markaðsherferðin Inspired by Iceland er talin hafa skilað 33,8 milljörðum króna í tekjur. Alls fóru 700 milljónir króna í átakið, en það er talið hafa skilað sér tæplega fimmtíufalt til baka. Þetta má lesa í skýrslu um átakið sem gerð verður heyrinkunn í dag.

Búist var við tíu prósenta fjölgun ferðamanna árið 2010, en eldgosið í Eyjafjallajökli setti strik í reikninginn. Ferðamenn í apríl voru 17 prósentum færri en í sama mánuði árið 2009 og spár gerðu ráð fyrir 22 prósenta samdrætti í ferðaþjónustu yfir sumarið, háannatímann.

Til að sporna við þessu var ráðist í átakið Inspired by Iceland, en yfir áttatíu fyrirtæki tóku þátt í því, ásamt ríki og Reykjavíkurborg. Ríkisstjórnin setti 350 milljónir króna í verkefnið, en afgangurinn kom frá Reykjavíkurborg og einkafyrirtækjum.

Þremur mánuðum eftir að átakið hófst hafði ferðamönnum fjölgað um 0,6 prósent miðað við sama tíma árið áður. Samkvæmt talningu Ferðamálastofu var heildarfjöldi erlendra gesta árið 2010 tæplega 495 þúsund og er um að ræða 0,2 prósenta aukningu frá 2009 en þá voru erlendir gestir 494 þúsund talsins.

Alls komu 108.855 fleiri ferðamenn til landsins árið 2010 en spár um samdrátt höfðu gert ráð fyrir. Það þýðir að í krónum talið komu 33,8 milljarðar aukalega inn í íslenskt efnahagslíf árið 2010.

Inga Hlín Pálsdóttir, forstöðumaður markaðssóknar hjá Íslandsstofu, segir þetta ánægjulega niðurstöðu. Hún bendir á að ferðaþjónustan hafi áhrif á allt samfélagið og samstillt markaðsátak sé nauðsynlegt. „Við erum í gríðarlega harðri samkeppni við hin löndin og verðum að nýta þann slagkraft sem tal um Ísland hefur núna.“

Á næstu dögum fer af stað nýtt markaðsátak, Ísland allt árið. Því er ætlað að fjölga ferðamönnum utan háannatímans. Ríkisstjórnin setur 300 milljónir í verkið og reiknað er með sömu upphæð frá einkaaðilum. Inga Hlín segir að það átak muni byggja á sama vörumerki og Inspired by Iceland. Um hreina viðbót við hefðbundið markaðsstarf sé að ræða.- kóp