Hvatti viðskiptavini til stöðutöku gegn krónunni

Glitnir banki hvatti viðskiptavini sína til að taka stöðu gegn krónunni í Morgunkorni greiningardeildar bankans frá árinu 2007 á sama tíma og stór huti viðskiptavina Glitnis átti allt sitt undir gengisstöðugleika íslensku krónunnar.

Á föstudaginn sl. féll dómur í Héraðsdómi Suðurlands á Selfossi í máli sem Íslandsbanki höfðaði á hendur tveimur viðskiptamönnum sínum vegna ógreidds skuldabréfs, en meðal málsástæða þeirra í greinargerð var að um væri að ræða ólögmætt gengistryggt lán. Hins vegar féll lögmaðurinn frá þessu við aðalmeðferð málsins og féllst á að um væri að ræða erlent lán, eða lán í erlendum gjaldmiðli. Því komust málsástæður á þeim grundvelli að um væri að ræða gengistryggt lán ekki að, en skuldarinn var dæmdur til að greiða eftirstöðvar skuldabréfsins. Málinu verður áfrýjað.

Meðal gagna sem stefndu lögðu fram í málinu var fréttabréf greiningardeildar Glitnis, svokallað Morgunkorn, frá 11. október 2007 sem er býsna athyglisvert. En þar segir orðrétt: „Gengisvísitala mun nálgast vísitölugildið 111 í kringum áramótin samkvæmt nýrri spá en þá ætti dollarinn að standa rétt undir 60 krónum og evran í tæpum 83 krónum. Um það leiti fer stöðutaka í erlendum myntum að verða vænlegur kostur að mati okkar."

Þarna var gengi krónunnar í raun í hámarki og með öðrum orðum var greiningardeild bankans að segja: gengið fellur, tryggið ykkur. Lögmenn skuldarans telja að Glitnir banki, forveri Íslandsbanka, hafi verið með þessari útgáfu greiningardeildarinnar að hvetja stóra viðskiptavini sína til þess að taka stöðu gegn krónunni, með því að taka stöðu í erlendum myntum á sama tíma og þorri viðskiptavina með gengistryggð lán átti allt sitt undir gengisstöðugleika íslensku krónunnar. Lögmenn skuldarans lögðu fram gögn þessu til stuðnings í málinu, en dómarinn tók hins vegar ekki tillit til þeirra.

Í dómi Héraðsdóms Suðurlands skautar dómarinn framhjá þessu og telur að með spánni hafi Íslandsbanki ekki unnið gegn hagsmunum skuldaranna í málinu eða rofið við þá trúnað. Samkvæmt upplýsingum sem fréttastofa fékk í dag frá greiningardeild Íslandsbanka er ekki hægt að fallast á að með þessu hafi bankinn sjálfur hvatt til þess að tekin yrði staða gegn krónunni. Greiningardeildin hafi verið sjálfstæð og spár og ráðleggingar hennar hafi verið settar fram með fyrirvara um að þær ákvarðanir sem teknar væru á grundvelli hennar væru á ábyrgð þess sem tæki þær.