Hraðlestin til Keflavíkurflugvallar sögð skila 13 milljörðum á fyrsta ári

Fyrsta árið sem hraðlest gengi milli Keflavíkur og Reykjavíkur er gert ráð fyrir að seldir verði 4,5 milljónir farmiða, sem skilar 13,5 milljarða króna tekjum. Þetta kemur fram í nýrri, óbirtri skýrslu RRV Consulting um verkefnið.

Eins og fram kom í Fréttablaðinu í gær vinnur Fluglestin þróunarfélag ehf. að því að ljúka samstarfssamningum við sveitarfélög á höfuðborgarsvæðinu vegna nauðsynlegra skipulagsbreytinga og lóðamála varðandi hraðlestina sem ganga á milli Leifsstöðvar og Umferðarmiðstöðvarinnar í Reykjavík.

Í skýrslu RRV er farið yfir ýmsar áætlanir og tölulega þætti sem tengjast hraðlestinni. Ef allt gengur upp eiga framkvæmdir að hefjast eftir þrjú ár og verða lokið að átta árum liðnum, árið 2024.

„Áætlað er að verkefnið skili jákvæðu tekjustreymi frá fyrsta ári,“ segir í skýrslunni. Yfir hálfrar aldar rekstrartímabil fái fjárfestar 15,2 prósenta árlega ávöxtun.

Þá segir að hraðlestin verði ábatasöm sem einkaframtak og þurfi engin bein fjárframlög frá opinberum aðilum en að gera þurfi fjárfestingarsamninga við ríkið og fá sérstaka löggjöf um skattgreiðslur.

Alls verða lestarteinarnir 49 kílómetra langir, þar af 14 kílómetrar í göngum fyrsta spölinn út úr höfuðborgarsvæðinu. Fyrir utan endastöðvarnar tvær á að vera einn viðkomustaður í suðurhluta Hafnar­fjarðar. Þar verði þjónustustöð og geymsla fyrir lestarvagna.

Samkvæmt skýrslunni verða lestarferðir frá klukkan fimm á morgnana til klukkan eitt eftir miðnætti. Farið verður á fimmtán mínútna fresti á annatíma þegar lestin annar 1.200 farþegum á klukkustund en með 30 mínútna millibili þess utan. Lestin mun ná 250 kílómetra hraða á klukkustund og ferðatíminn verða 15 til 18 mínútur eftir því hvort komið verður við á aukastoppistöðinni.

Vitnað er til spár Isavia um þróun farþegafjölda um að komur og brottfarir farþega í alþjóðaflugi verði samtals 5,3 milljónir á árinu 2024. Alls verði 2,7 milljónir farmiða seldar vegna þessa hóps og aðrar 1,8 milljónir farmiða til annarra sem ferðist milli Reykjaness og höfuðborgarsvæðisins. Er þar átt við námsmenn og starfsmenn fyrirtækja við báða enda lestarlínunnar.

Nefnd eru dæmi um fargjöld í lestum sem ganga frá flugvöllum í svipaðri fjarlægð frá borgarkjörnum. Reiknað er með að hér gætu lægstu fargjöld verið um 1.000 krónur en hæstu 4.300 krónur. Meðalfargjaldið verði hins vegar 3.100 krónur. Sem fyrr segir er gert ráð fyrir að seldir farmiðar, samtals fram og til baka, verði 4,5 milljónir árið 2024. Tíu árum síðar verði þeir orðnir 5,9 milljónir talsins.

Að baki Fluglestinni standa Landsbankinn, fasteignafélagið Reitir, Kadeco á Keflavíkurflugvelli, Efla og Ístak. Samkvæmt heimildum Fréttablaðsins er fjárfesta nú leitað bæði innanlands og utan. Áætlað er að hlutafé nemi fimmtungi heildarkostnaðarins eða um 20,6 milljörðum króna. Að öðru leyti á að greiða stofnkostnaðinn, sem í heild er 105 milljarðar króna, með lánsfé sem endurgreiðist á 27 árum með 3,0 til 4,5 prósent vöxtum.

„Reiknað er með að hluthafar hafi endurheimt fjárfestingu sína að fullu á tólfta rekstrarári,“ segir í skýrslunni fyrir Fluglestina þróunarfélag sem á ensku heitir Lava Express.