Hitaveitur spara Íslendingum 112 milljarða á ári

Hitaveitur spara Íslendingum um 112 milljarða á ári ef borið er saman við kostnað við að kynda heimili landsmanna með olíu. Þetta kom fram á nýafstöðnum ársfundi Orkustofnunnar. 

Það virðist hafa verið mikið heillaskref hjá íslenskum stjórnvöldum að setja aukinn þunga í uppbyggingu hitaveitna á miðri síðustu öld. Ef litið er til þess hver kostnaðurinn hefði verið fyrir heimilin í landinu ef áfram hefði verið kynt með olíu þá nemur uppsafnaður sparnaður 2.300 milljörðum króna frá árinu 1914 til ársins 2012.

„Allt það fjármagn sem ríkið hefur sett í uppbyggingu hitaveitna víðsvegar um landið hefur skilað sér margfalt tilbaka,“ segir Jónas Ketilsson, verkefnastjóri hjá Orkustofnun.

Notkun Íslendinga á orkugjöfum hefur breyst mikið á síðustu 40 árum. Um helmingur íslenskra heimila var áður upphitaður með olíu árið 1970 en nú eru þau undir einu prósenti. Jónas segir orkusjálfstæði Íslendinga mikið. Hann bendir á í þessu samhengi á þá stöðu sem komin er upp í Evrópu en þar ríkir talsverður óróleiki vegna hernaðaríhlutunar Rússa í Úkraínu sem gæti ógnað orkuöryggi margra Evrópuþjóða.

„Innan Evrópusambandsins þá kemur þriðjungur af gasi frá Rússlandi, að hluta til í gegnum Úkraínu. Sá óróleiki sem nú er innan Úkraínu hefur áhrif á orkuöryggi Evrópusambandsins,“ segir Jónas. „Af þeim sökum horfir Evrópusambandið til nýtingar innlendra orkugjafa og í því samhengi er Ísland gott fordæmi.“