Heldur áfram í Borgias

Björn Hlynur Haraldsson er nýkominn til landsins eftir fimm mánaða dvöl erlendis. Þar lék hann í sjónvarpsþáttunum Borgias og mexíkóskri bíómynd.

„Það er fínt að vera kominn aftur til Íslands. Ég kom heim rétt fyrir jól," segir leikarinn Björn Hlynur Haraldsson sem hefur dvalið í

Búdapest síðustu fimm mánuði.

Þar hefur Björn Hlynur verið við tökur á sjónvarpsþáttunum The Borgias, sem skarta leikaranum Jeremy Irons í aðalhlutverki. Tökur voru umfangsmiklar og fóru fram í stóru kvikmyndaveri rétt fyrir utan Búdapest. Björn Hlynur vill lítið tjá sig um sjálft hlutverkið en segist þó leika Ítala sem líklega kemur töluvert við sögu í þessari þriðju seríu The Borgias, sem verður frumsýnd með vorinu í Bandaríkjunum. „Þetta voru viðamiklar tökur í stóru stúdíói þar sem búið var að byggja heilu borgirnar. Þetta var mikil upplifun og gaman að taka þátt í þessu verkefni," segir Björn Hlynur og ber stjörnu þáttana, Jeremy Irons, vel söguna. „Hann er viðkunnanlegur. Það kom í ljós að hann er mikill aðdáandi Íslands. Hann hefur komiðhingað nokkrum sinnum, meðal annars til að taka upp nýútkomna heimildamynd um umhverfismál."

Á meðan á dvöl Björns Hlyns stóð í Búdapest náði hann að skreppa yfir til Kanada í þrjár vikur þar sem hann lék í mexíkósku myndinni Deserted Cities sem verður frumsýnd á árinu. „Vinur minn, leikarinn Gael García Bernal, leikur aðalhlutverkið í þeirri mynd og það small saman við frí sem ég fékk í október. Ég leik Pólverja í þeirri mynd svo það má segja að ég sé orðinn frekar alþjóðlegur eftir síðasta ár."

Björn Hlynur ætlar þó að stoppa aðeins við á Íslandi í þetta sinn, en hann er að hefja tökur á annarri seríu af sjónvarpsþáttunum Ástríði þar sem hann fer með hlutverk lögfræðings. Hann viðurkennir að það sé gaman að taka að sér verkefni erlendis enda sé sífellt meira um að íslenskir leikarar láti ljós sitt skína á erlendum vettvangi. „Það virðist ganga vel hjá okkur núna. Þetta opnar örugglega einhverjar dyr og ég fer í það minnsta í fjórðu seríuna af The Borgias á þessu ári. Annað verður að koma í ljós."alfrun@frettabladid.is