Heimsfræg hollensk snekkja í Reykjavíkurhöfn

Við gömlu höfnina í Reykjavík er nú bundin við landfestar heimsfræga snekkjan Dwinger sem tók tíu ár að smíða. Hún er með mastur eins og skúta og er þetta hæsta mastur á snekkju sinnar tegundar í heiminum. Fleyið er hér í stuttu stoppi á leið sinni til og frá Grænlandi.

Hvar liggja mörkin á milli snekkju og skútu? Dwinger er raunar heimsþekkt snekkja og er meira að segja með sína eigin heimasíðu. Mastrið á snekkjunni er það hæsta í heiminum á bát af þessari gerð. Smíði snekkjunnar hófst 2002 í Amsterdan og lauk ekki fyrr en áratug síðar en fleyið er skráð á hollenska fyrirtækið Victorius Shipping. Svartfjalllendingurinn Dejan Tesic er skipstjóri og stýrir förinni yfir Norður-Atlantshafið fyrir hönd eigandans.

Dejan segir að það hafi legið beinast við að heimsækja Ísland úr því þeir voru að fara til Grænlands. Eigandinn nýtur þess að sigla.