Innlent

Hard Rock lokar

Veitingastaðnum og rokkminjasafninu Hard Rock Cafe í Kringlunni hefur verið lokað eftir átján ára rekstur. Allir erlendir rokkmunir verða sendir til Hard Rock samsteypunnar vestanhafs en ekki er ljóst hvernig íslensku munirnir verða varðveittir. Hard Rock var opnað sama ár og Kringlan, árið 1987, en það var veitingamaðinn Tómas Tómasson sem opnaði og rak staðinn á sínum tíma. Staðurinn sló strax í gegn og varð gríðarlega vinsæll veitingastaður. Undanfarin ár hefur þó hallað undan fæti í rekstrinum og aðsóknin ekki verið sem skyldi og svo fór að ákvörðun var tekin um að loka staðnum. Það voru blendnar tilfinningar hjá starfsmönnum þegar þeir voru að ganga frá og taka niður rokkmuni þegar fréttamann Stöðvar 2 bar að garði í dag. Elías Árnason, framkvæmdastjóri Hard Rock, segir starfsemina hafa verið góða á sínum tíma en tímarnir séu breyttir. Hann segir stað sem þennan eiga betur heima í miðbænum sökum stemningarinnar sem erfitt sé að mynda í verslunarmiðstöð eftir að henni lokar. Elís er bjartsýnn á að einhverjir íslenskir veitingamenn eigi eftir að taka sig til og opna nýjan Hard Rock stað í borginni, en ekkert liggur fyrir um slík áform enn sem er. Sjálfur hefur hann fært sig um set og tekið við veitingarekstri í Smáralindinni. Spurður hvað verði um alla munina á veitingastaðnum segir Elís erlendu munina verða senda til Hard Rock samsteypunnar vestanhafs, enda eigi hún þá, en ekki sé ljóst hvernig íslensku munirnir verða varðveittir. Tónlistarmennirninr sjálfir eiga þá en ýmsar hugmyndir eru þó uppi á borðum um hvað verði gert við þá.


Athugið. Vísir hvetur lesendur til að skiptast á skoðunum. Allar athugasemdir eru á ábyrgð þeirra er þær rita. Lesendur skulu halda sig við málefnalega og hófstillta umræðu og áskilur Vísir sér rétt til að fjarlægja ummæli og/eða umræðu sem fer út fyrir þau mörk. Vísir mun loka á aðgang þeirra sem tjá sig ekki undir eigin nafni eða gerast ítrekað brotlegir við ofangreindar umgengnisreglur.

Fleiri fréttir

Sjá meira


×