Hælisleitandanum áður verið veitt hæli í öðru Evrópuríki

Hælisleitandinn frá Íran sem hellti yfir sig eldfimum vökva í húsakynnum Rauða Krossins í Efstaleiti í Reykjavík í dag kom hingað til lands og sótti um hæli í mars. Málið hefur tafist nokkuð umfram 90 daga viðmiðunartíma í málum hælisleitenda vegna bágs andlegs ástands mannsins og erfiðleika tengdum því. Það kemur fram í tilkynningu frá Útlendingastofnun.

Þar segir að manninum hafi áður verið veitt hæli og viðurkennd staða flóttamanns í öðru Evrópuríki. Hann hafi engu að síður sótt um hæli hér á landi í mars. Maðurinn hótaði að kveikja í sér í hádeginu í dag og var fjölmennt lið lögreglu auk slökkviliðsmanna kallað út. Ekki kom þó til þess að maðurinn kveikti í sér en hann var fluttur af vettvangi af lögreglu.

Útlendingastofnun segir að framganga mannsins og önnur sjálfskaðandi hegðun muni ekki hafa áhrif á framgang eða úrlausn í hans máli. Það sé í hefðbundnum farvegi og muni stofnunin kappkosta að ljúka því sem fyrst, rétt eins og öðrum málum.

„Þegar hælisleitendur hóta að skaða sjálfa sig eða sýna af sér sjálfskaðandi hegðun leggur Útlendingastofnun áherslu á að tryggja þeim viðeigandi aðstoð og ráðgjöf með aðkomu félagsþjónustunnar, Rauða kross Íslands, sálfræðinga, lækna og eftir atvikum talsmanns viðkomandi. Allt kapp er lagt á að veita aðstoð og liðsinni í samræmi við óskir og þarfir viðkomandi.“