Hægt að fara í kvöldsund um helgar í Vesturbænum og Breiðholti í sumar

Vesturbæjarlaug og Breiðholtslaug verða opnar til klukkan 22 á kvöldin laugardaga og sunnudaga í sumar, það er frá og með 1. júní næstkomandi til 4. september en leikarinn Ólafur Egilsson greinir frá þessu í færslu á Facebook-síðu sinni og birtir þar bréf frá sviðsstjóra íþrótta-og tómstundaráðs.

Þar segir Ólafur að hann hafi í huast staðið fyrir undirskriftasöfnun þar sem hann skoraði á borgaryfirvöld að lengja opnunartíma sundstaða til klukkan 22 um helgar. Í dag loka þeir flestir klukkan 18 en Laugardalslaug er þó opin til klukkan 22.

Eins og áður segir verða Vesturbæjarlaug og Breiðholtslaug opnar lengur í sumar og þá verður Sundhöllin líka opin til 22 þegar hún opnar að nýja sem verður vonandi í haust.

Ólafur segir í færslunni að þetta sé áfangasigur; hann hefði auðvitað viljað fá lengri opnunartíma í gagnið strax í gær en ekki í júní og þá verði áfram bara opið til klukkan 20 á föstudögum.

„Frá því að ég fékk bréfið hér að neðan hef ég hinsvegar verið í samskiptum við Ómar Einarsson sviðsstjóra ÍTR og hann og Þórgnýr Thoroddsen formaður ÍTR fyrir hönd Pírata hafa tjáð mér að mikill „jákvæðni“ sé fyrir því að þetta fyrirkomulag verði framlengt.

Ég vona að það gangi eftir svo ekki þurfi að koma til endurtekinnar undirskriftasöfnunnar í haust.

Einnig væri óskandi að opnunartíminn verði lengdur til 22:00 á föstudögum.

En sumsé:

Ég þakka ÍTR, Ómari, Þórgný og Borginni fyrir að taka erindinu vel.

Allir í kvöldsund um helgar í sumar og vonandi næsta vetur líka.

Lifi byltingin,“ segir Ólafur Egilsson.

Uppfært: Ranglega var farið með opnunartíma Laugardalslaugarinnar í fyrri útgáfu fréttarinnar. Það hefur nú verið leiðrétt.