Innlent

„Instagram spilaði stóran þátt í sprengingunni sem varð á Íslandi“

Birgir Olgeirsson skrifar
Í greininni kemur fram að áhrifavöldum hafi verið borgað til að kynna landið á Instagram.
Í greininni kemur fram að áhrifavöldum hafi verið borgað til að kynna landið á Instagram. FBL/Stefán
Uppgangur í ferðaþjónustu á Íslandi hefur verið mikill undanfarin ár en fullyrt er á vef kanadíska fjölmiðilsins Global News að það megi að hluta rekja til samfélagsmiðilsins Instagram.

Rætt er við nokkra Íslendinga sem hafa kannað málið en í greininni er meðal annars haldið fram að viðbrögð við myndum sem einstaklingar setja inn frá ferðalögum sínum séu farin að ráða því hvort ferðalangar verði ánægðir með ferðina eða ekki.

Í greininni er einnig haldið fram að fólk sé farið að velja sér áfangastaði út frá því hvort að myndirnar þaðan verði vinsælar á Instagram.

Úr 300 þúsund í níu milljónir

Á meðal þeirra sem er rætt er við er áhrifavaldurinn Gunnar Freyr Gunnarsson. Instagram-reikningur hans, Icelandic Explorer, nýtur mikilla vinsælda en Gunnar segist hafa fylgst náið með þróun mynda frá Íslandi á Instagram.

Hann byrjaði á Instagram árið 2014 en hann segir að á þeim tíma hafi færslum sem varða Ísland fjölgað úr 300 þúsund í níu milljónir.



Draumaland ljósmyndarans

Sveinn Birkir Björnsson, forstöðumaður samskiptasviðs Íslandsstofu, segir við Global News að 85 til 90 prósent þeirra sem ferðast til Íslands geri það til að skoða náttúruna.

„Ísland er draumaland ljósmyndarans,“ er haft eftir Sveini.

Íslandsstofa er meðal annars sögð hafa borgað áhrifavöldum til að koma til Íslands til að taka myndir og birta á reikningum sínum til að ná til stærri markhóps.

 
 
 
View this post on Instagram
Ready for a roadtrip and these standard window views? #Iceland

A post shared by Asa Steinars ▪️I C E L A N D (@asasteinars) on Nov 25, 2018 at 11:07am PST

„Instagram spilaði stóran þátt í sprengingunni sem varð á Íslandi,“ er haft eftir áhrifavaldinum Andy To í greininni sem sagðist aldrei hafa heyrt minnst á Ísland fyrir utan það sem hún sá á Instagram.

Einnig er rætt við Brent Smyth sem ferðaðist nýverið til Íslands en hann sagðist allt í einu hafa séð fjölda mynda frá fólki sem hann fylgdist með á Instagram frá Íslandi.

„Það varð þess valdandi að ég vildi fara þangað,“ er haft eftir Smyth.



Velja áfangastaði sem eru líklegir til vinsælda

Í greininni er vitnað í könnun sem framkvæmd var í Bretlandi á meðal ungs fólks. Þar sögðust fjörutíu prósent velja sér áfangastaði út frá því hversu Instagram-vænir þeir væru.

Sveinn segir í samtali við Global News að Íslandsstofa reyni að markaðssetja staði á Íslandi sem ekki hafa notið mikilla vinsælda á meðal ferðamanna, til að reyna dreifa umferð þeirra um landið.

Gunnar Freyr segir áhrifavalda, ljósmyndara og ferðalanga bera ábyrgð, sér í lagi þegar þeir birta myndir frá viðkvæmum og afskekktum svæðum.

„Sem betur fer hefur orðið fjölgun þeirra á Instagram sem hvetja til góðrar hegðunar.“




Fleiri fréttir

Sjá meira


×