Handtekinn vegna and­láts ungrar konu á Akur­eyri

Lögreglan á Norðurlandi eystra rannsakar nú andlát ungrar konu sem fannst látin á heimili sínu, í íbúð í fjölbýlishúsi á Akureyri í gærmorgun, 21. október. Einn er í gæsluvarðhaldi vegna málsins. Frá þessu er greint á Facebook síðu embættisins.

Þar segir að rannsóknin beinist að því að upplýsa um hvenær og hvernig andlátið átti sér stað en dánarorsök liggur ekki fyrir. 

Einn maður var handtekinn vegna málsins og var hann í dag úrskurðaður í gæsluvarðhald til föstudagsins 26. október, eða næstkomandi föstudags. Sá maður er talinn hafa verið á vettvangi þegar konan lést. Lögreglan á Norðurlandi eystra getur ekki gefið frekari upplýsingar um málavexti meðan fyrstu aðgerðir rannsóknarinnar standa enn yfir, að því er fram kemur í tilkynningunni.