Lífið

Slökun, sítrusávextir og hollur heimalagaður matur

Kristjana Björg Guðbrandsdóttir skrifar
Lax og egg eru matartegundir ríkar af d-vítamíni.
Lax og egg eru matartegundir ríkar af d-vítamíni.

Dr. Teitur Guðmundsson gefur lesendum góð ráð til að verjast pestum vetrarins.

Flensur og kveisur?

– Hvernig er best að verjast því að fá flensu og kveisur vetrarins?
„Við vitum að það ganga mjög margar pestir yfir haust og vetrarmánuðina, inflúensan kemur iðulega um miðjan vetur og er þá bólusetning ágætis vörn. Það að bólusetja sig reglulega byggir upp ónæmi gegn flensuveiru sem er á hverju ári nýr stofn og þess vegna þarf að framkvæma bólusetninguna árlega. Almenna reglan er svo sú að fara vel með sig, fá nægan svefn og huga að streituþáttum og vellíðan, álag hefur dempandi áhrif á ónæmis­kerfið og viðbragð þess.“

Dr. Teitur Guðmundsson leggur áherslu á gott mataræði, slökun og hreyfingu.

– Á hverju á fólk að vara sig?
„Það er ágætt að hafa það í huga að flest smit eru dropa- og snertismit, þannig að mikil nálægð við veika einstaklinga getur valdið veikindum og smiti, handþvottur er ágæt regla líka til að draga úr líkum á smiti.“

– Áttu einhver góð ráð um matar­æði eða lífsstíl sem fólk ætti að fylgja?
„Þetta er mjög einstaklingsbundið auðvitað en með vísan til þess sem segir hér að ofan er aðalatriðið að vera í góðu jafnvægi. Almennt má segja að næringarríkur matur, fjölbreyttur og ferskur sé lykil­atriði. Skyndifæði og unnin matvara er ekki skynsamleg almennt burtséð frá því hvaða tími ársins er. Ávextir og grænmeti eru rík af vítamínum og bætiefnum, sérstaklega sítrusávextir.“

Jóga styrkir og mýkir líkamann.

– En bætiefni og vítamín?
„Bætiefni og vítamín fáum við flest hver með réttu mataræði og ef upptaka í líkamanum er í lagi. Það má þó segja að líklega fáum við ekki nóg af D-vítamíni og það má bæta það upp sérstaklega. Ýmis bætiefni eru nefnd til sögunnar  líkt og C-vítamín, sink, ýmis andoxunarefni og margt fleira. Flest eru vítamínin vatnsleysanleg svo það er erfitt að gera sér illt, B-vítamín hafa löngum verið notuð og við vitum að þau dempast við streitu og álag. Hin fituleysanlegu geta verið varhugaverðari og ætti ekki að taka inn í óhófi en það eru A-, D-, E- og K-vítamín.“

– Hvernig styrkir fólk ónæmiskerfið ef það hefur hug á því?
„Best er að hreyfa sig reglulega, borða hollan mat og ferskan, elda sjálfur og njóta, huga að svefninum sérstaklega, að fá nægan svefn, og draga úr streitu og álagi almennt ef hægt er eru svona þessi hefbundnu ráð. Það getur svo verið skynsamlegt að iðka slökun og hugleiðslu eða jóga til viðbótar.

Heitt sítrónuvatn er afar mikil heilsubót að sögn Teits.

Gott
- Jóga og hugleiðsla
- Sítrusávextir
- Hollur heimalagaður matur
- C-, B- og D-vítamín
- Sink
- Handþvottur
- Hreyfing

Slæmt
- Skyndifæði og unnin matvara
- Streita og álag

Það er ágætt að hafa það í huga að flest smit eru dropa- og snertismit, þannig að mikil nálægð við veika einstaklinga getur valdið veikindum og smiti.

Meira á www.frettablaðið.is.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.