Stal 370 þúsund króna úri af þjófum

Lögreglan á Suðurnesjum handtók á miðvikudag þrjá karlmenn vegna rannsóknar á máli er kom upp þegar úri að verðmæti 370 þúsund krónur var stolið úr úra- og skartgripaversluninni Georg V. Hannah.

Upptökur úr eftirlitsmyndavélum í versluninni leiddu til handtöku tveggja af mönnunum en þeir munu samkvæmt heimildum Vísis hafa gengið út úr versluninni að degi til með úrið í sínum fórum. Þeir voru þeir færðir til skýrslutöku á lögreglustöð.

Hinn þriðji var svo grunaður um að hafa hnuplað úrinu úr húsnæði annars hinna tveggja fyrrnefndu. Við leit á honum fannst úrið innan klæða hans.

Lögregla gerði húsleit vegna málsins, að fenginni heimild, og þar fundust meint fíkniefni víðs vegar í viðkomandi húsnæði, auk hnúajárns og hnífs.