Siðfræðistofnun þyrfti aukinn styrk til að ráðleggja stjórnvöldum

Formaður stjórnar Siðfræðistofnunar segir að ráða þurfi inn starfsmenn og auka fjármagn til stofnunarinnar eigi hún að vera ráðgefandi um siðferðileg álitamál fyrir stjórnvöld eins lagt er til í skýrslu um eflingu trausts á stjórnmálum og stjórnsýslu. Starfshópur á vegum forsætisráðherra sendi frá sér skýrsluna fyrr í vikunni.

Ein af tillögum hópsins er að Siðfræðistofnun Háskóla Íslands taki að sér að veita stjórnvöldum ráðgjöf um siðferðileg álitamál. Formaður hópsins sagði í fréttum Stöðvar 2 á miðvikudag  að verði þetta að veruleika gæti það falið í sér jákvæðar breytingar á kerfinu. 

Vilhjálmur Árnason, formaður stjórnar Siðfræðistofnunar segir aukið fjármagn þurfa að koma til eigi stofnunin að geta sinnt verkefni sem þessu.

„Þetta er mjög algengt í nágrannalöndum okkar þar sem hafa verið starfandi einskonar landsiðaráð. Þar sem að stofnun á borð við Siðfræðistofnun er þá stjórnvöldum til ráðgjafar í undirbúningi löggjafar sem varðar siðferðileg álitamál sem síðan getur orðið grundvöllur fyrir almenna umræðu og jafnvel efnt til málþinga þannig að það verði upplýst umræða í samfélaginu í aðdraganda löggjafar,” segir Vilhjálmur.

Siðfræðistofnun heyrir undir hugvísindasvið háskólans og fær rekstrafé þaðan. Stofnunin er hins vegar fjármögnuð að stórum hluta með sjálfsaflafé og styrkjum til sérstakra verkefna.

„Hér er fagleg þekking til staðar en Siðfræðistofnun hefur staðið mjög höllum fæti fjárhagslega. Það er til dæmis enginn starfandi forstöðumaður hjá okkur núna. Þannig að það þarf að koma til að við getum ráðið starfsmann eða starfsmenn sem geta helgað sig þessu,” bendir hann á.

Hefur eitthvað verið rætt við ykkur?

„Nei, ekki af hálfu stjórnvalda. Mér var kunnugt um þessa tillögu og hún borin stuttlega undir mig í aðdragandanum. En ekki verið rætt við okkur á neinn formlegan hátt,” segir hann.