Innlent

Þriðjungi fleiri aldraðir fá aðstoð til að geta búið á eigin heimili

Berghildur Erla Bernharðsdóttir skrifar

Stórauka á möguleika aldraðra sem þurfa mikinn stuðning og þjónustu til að búa á eigin heimili með nýrri þjónustu á Akureyri. Framkvæmdastjóri öldrunarþjónustunnar í bænum telur að með breytingunni geti um þriðjungi fleiri nýtt sér þjónustuna en áður.

Kynningarfundur um nýja þjónustuform var haldinn í velferðarráðuneytinu í dag. Umbreyta og aðlaga á þjónustu sem nú er veitt með skammtímadvöl í svokölluðum hvíldarrýmum og bjóða þess í stað upp á fjölbreytta dagþjónustu þar sem unnt er að mæta ólíkum þörfum notenda.

Boðið verður uppá þjónustuna alla daga ársins. Halldór S. Guðmundsson, framkvæmdastjóri Öldrunarþjónustunnar á Akureyri, segir að mun fleiri fái notið þjónustunnar en áður.

„Með þessari breytingu sem við förum í núna reiknum við með að við förum frá 65 og upp í kannski 95 eða 100 einstaklinga ári sem geta komið og notið þjónustunnar. Það sem skiptir öllu máli er að við gerum ráð fyrir að fólk sé í þjónustu sem hentar því í þann tíma sem það þarf á henni að halda,“ segir hann.

Þjónustan verður tekin í gagnið um næstu áramót. Svandís Svavarsdóttir, heilbrigðisráðherra, telur að formið verði tekið upp á öðrum hjúkrunarheimilum ef vel tekst til.

„Mér finnst það sérstaklega ánægjulegt að við getum hér í ráðuneytinu stutt við þetta frumkvæði sem kemur að norðan og ég sé fyrir mér að fleiri aðilar geti tekið þetta upp vegna þess að væntingar og kröfur aldraðra eru eins fjölbreyttar og þar eru margir einstaklingar,“ segir hún.

Halldór Gunnarsson, varaformaður Félags eldri borgara á Akureyri, er afar sáttur við breytinguna.

„Mér líst mjög vel á þessa breytingu og tel að við getum hlakkað til, við sem erum orðin eldri borgarar á Akureyri.“



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.