Innlent

Hraustlegt hvassviðri í kvöld

Stefán Ó. Jónsson skrifar
Það mun blása töluvert víðsvegar landinu í dag.
Það mun blása töluvert víðsvegar landinu í dag. Veðurstofan

Veðurstofan varar við töluverðu hvassviðri á Suður- og Vesturlandi síðar í dag. Þá getur jafnframt orðið mjög hvasst á miðhálendinu eftir því sem líður á daginn. Lægð sem liggur við Hvarf þessa stundina mun framkalla vaxandi suðlæga átt í dag og munu önnur skil, sem koma í kvöld, verða nokkuð hraustleg að sögn Veðurstofunnar.

Spáð er stífri sunnan- og suðaustanátt með rigningu, þar af talsverðri rigningu sunnan og suðaustantil í nótt og í fyrramálið. Hviður við fjöll geta farið upp í 30 m/s og jafnvel 40 m/s á hálendinu. Gular viðvaranir eru í gildi og er fólki bent á þær.

„Það er ekki útlit fyrir að þessi lægð slái nein met en hún getur engu að síður haft áhrif ef aðgát er ekki höfð, til dæmis hjá tjaldferðalöngum, bílum með aftanívagna og fólki með trampólín og laus garðhúsgögn í nærumhverfi sínu,“ segir veðurfræðingur.

Þá frysti einnig víða á landinu í nótt - enda hægur vindur og víða léttskýjað. Næstu nótt er ekki útlit fyrir að hiti fari undir frostmark, en með lækkandi sólu má eðlilega gera ráð fyrir að þetta gerist aftur og aftur á næstu vikum enda ekki mikið eftir af sumrinu.

Það stefnir svo í suðvestan strekking og skúri eða rigningu sunnan- og vestanlands á morgun og laugardag. Annars verður hægari vindur og bjartara veður.

Veðurhorfur á landinu næstu daga

Á föstudag:
Suðaustan 10-18 m/s árla dags og talsverð rigning, einkum SA-lands. Síðan suðvestan 8-13 með skúrum, en léttir til N- og A-lands. Hiti 7 til 15 stig, hlýjast á NA-horninu. 

Á laugardag:
Suðvestan 8-15 m/s og rigning eða skúrir, en bjartviðri NA- og A-til. Hiti 7 til 14 stig, hlýjast á A-landi. 

Á sunnudag:
Vestlæg eða breytileg átt, víða 3-8 m/s en strekkingur syðst. Væta um landið vestanvert, en bjartviðri að mestu A-lands. Hiti 7 til 12 stig. 

Á mánudag:
Suðlæg átt og fer að rigna S- og V-lands þegar líður á daginn, en úrkomulítið í öðrum landshlutum. Hiti breytist lítið. 

Á þriðjudag:
Suðvestlæg eða breytileg átt og víða væta með köflum. Hiti 7 til 13 stig. 

Á miðvikudag:
Útlit fyrir norðlæga átt með dálítilli úrkomu fyrir norðan og kólnandi veðri, en bjart með köflum syðra.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.