Innlent

Ferðaþjónustufólk reynir að bjarga andarnefjum í Engey

Kjartan Kjartansson skrifar
Önnur andarnefjan föst í fjörunni í Engey.
Önnur andarnefjan föst í fjörunni í Engey. Sverrir Tryggvason

Tvær andarnefjur sitja nú fastar í fjöru í Engey fyrir utan Reykjavík. Hópur fólks frá ferðaþjónustufyrirtækinu Special Tours reynir nú að halda lífi í dýrunum þar til flæðir að aftur. Skipstjóri á bátnum Dagmar segir andarnefjurnar skornar af grjótinu og mikið blóð sé í fjörunni.

Starfsfólk á einum báta Special Tours varð dýranna vart um klukkan eitt í dag. Þá hélt hópur starfsfólks fyrirtækisins út í Engey til að huga að þeim, þar á meðal Sverrir Tryggvason, skipstjóri bátsins Dagmar.

Landhelgisgæslan og starfsmenn hvalaskoðunafyrirtækjanna Elding og Whale Safari eru einnig á svæðinu.

Sverrir segir við Vísis að andarnefjurnar hafi að líkindum fest sig í fjörunni við að elta makríl. Hópurinn hafi reynt að koma handklæðum og lökum yfir dýrin til að halda á þeim hita og bera vatn til að hella yfir þær. Aðrir starfsmenn séu á leiðinni með dælu til að dæla vatni yfir þær og fleiri handklæði og fötur.

Myndskeiðið í spilaranum hér fyrir neðan tók Sverrir af hvölunum í Engey.

Ætlunin er að reyna að halda þeim á lífi þar til flæðir aftur. Sverrir segir hins vegar nokkuð í að það gerist því enn sé að fjara út. Ekki er háflóð í Reykjavík fyrr en rúmlega tíu í kvöld.

Andarnefjurnar eru illa haldnar, að sögn Sverris. Þær eru alveg á þurru og kremjast undan eigin þunga í fjörunni. Þær séu nánast hættar að hreyfa sig, heldur liggi aðeins og andi. Mikið sé af blóði því þær hafi skorið sig á steinunum í fjörunni.

Sverrir er vongóður um að hægt sé að bjarga andarnefjunum ef þeim tekst að halda þeim blautum. Önnur þeirra sé hins vegar fest í töluverðri dæld og falla þurfi vel að áður en hægt verði að hreyfa hana.

Vísir/Friðrik Þór
Vísir/Friðrik Þór
Vísir/Friðrik Þór
Vísir/Friðrik Þór


Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.