Innlent

Myndarleg lægð gerir atlögu um helgina

Stefán Ó. Jónsson skrifar
Það verður eflaust notalegt að kúldrast í tjaldi um helgina.
Það verður eflaust notalegt að kúldrast í tjaldi um helgina. Vísir

Lægð hefur komið sér fyrir skammt norður af landinu og beinir vestlægum áttum yfir landið í dag. Veðustofan gerir því ráð fyrir að veður verði vætusamt um landið norðanvert og fremur svalt. Lægðin þokast síðan norður á bóginn og því dregur smám saman úr úrkomunni og styttir víða upp í innsveitum síðdegis.

Það verður þurrt að kalla syðra fyrir hádegi og sums staðar þokuloft sem „léttir vonandi“ þegar kemur fram á morguninn. Eftir hádegi má hins vegar búast við síðdegisskúrum sunnan- og austanlands. Hitinn verður á bilinu 8 til 19 stig, hlýjast á Suðurlandi en kaldast á Vestfjörðum.

Ætla má að það verði rólegheitaveður á morgun; hæg suðvestlæg átt og skúrir í flestum landshlutum, einkum síðdegis. Búist er við því að „grunn lægð“ komi upp að suðvesturhorninu á föstudag þar sem rigna mun eftir hádegi. Rigningin færist svo norður og austur þar sem gera má ráð fyrir því að skýjað verði með köflum og síðdegisskúrir.

Einnig er útlit fyrir að það rigni eitthvað á suðausturhorninu fyrrihluta laugardags - á meðan annars staðar á landinu verði hæglætisveður og áfram víða síðdegisskúrir.

Önnur heldur myndarlegri lægð er líkleg til að gera atlögu á sunnudag með strekkings austanátt og rigningu sunnantil á landinu, en lengst af fínt veður fyrir norðan.

Nýjustu spár Veðurstofunnar reikna jafnframt með að skilin frá henni gangi yfir landið á mánudag með tilheyrandi vætu um allt land.

Veðurhorfur á landinu næstu daga

Á fimmtudag:
Suðvestlæg átt, 3-8 og skúrir, einkum síðdegis. Hiti 8 til 16 stig, svalast á annesjum N-til.

Á föstudag:
Hæg suðlæg eða breytileg átt, dálítil rigning við SV-ströndina, en annars skýjað og stöku skúrir einkum NA-til síðdegis. Hiti breytist lítið.

Á laugardag:
Hæg norðvestlæg eða breytileg átt. Skýjað og dálítil rigning A-lands framan af degi en léttir síðan til. Annars bjart með köflum en stöku síðdegisskúrir A-til. Hiti 8 til 18 stig, hlýjast V- og S-lands.

Á sunnudag:
Suðaustan 8-13 við SV-ströndina, en annars hægari. Þykknar upp SV-til og lítilsháttar væta við ströndina síðdegis, en léttskýjað N- og A-lands. Hiti 11 til 20 stig, hlýjast N-til.

Á mánudag (frídagur verslunarmanna):
Útlit fyrir suðaustlæga átt með vætu, en þurrrt að kalla NA-til. Styttir víða upp SV- og V-lands seinnipartinn. Hiti breytist lítið og hlýjast NA-til.

Á þriðjudag:
Suðlæg eða breytileg átt, dálítil væta við V-ströndina, en annars þurrt að mestu. Áfram milt í veðri.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira


Velkomin á Vísi. Þessi vefur notar vafrakökur. Sjá nánar.