Haldlögðum munum fargað hjá lögreglu

Dæmi er um að verðmætum munum í eigu sakbornings hafi verið fargað í geymslu lögreglu. Lögreglan á höfuðborgarsvæðinu breytti verklagi sínu eftir að úr og skartgripir hurfu í vörslum hennar árið 2013, en ekki liggur fyrir hvaða breytingar voru gerðar.

Sagt var frá því í gær að ríkissaksóknari hefði staðfest að hætta skyldi niðurstöðu á hvarfi haldlagðra muna í Strawberries málinu svokallaða. Um var að ræða úr, skartgripi og önnur verðmæti sem haldlögð voru við húsleit hjá eiganda staðarins 2013 – en munirnir reyndust horfnir þegar eigandinn ætlaði að nálgast þá á ný.

Frétt Stöðvar 2: Segir munina að lágmarki tuttugu milljón króna virði

Gagnrýnir vinnubrögð lögreglu

Málið var bæði rannsakað af héraðssaksóknara og lögreglunni á höfuðborgarsvæðinu sjálfri – en hvorug rannsóknin var talin líkleg til að bera árangur. Í samtali við kvöldfréttir í gær gagnrýndi lögmaður mannsins vinnubrögð lögreglunnar harðlega.

„Ítrekað haldleggur lögreglan haldleggur lögreglan muni, hvort sem er gsm síma eða aðra smámuni við rannsókn sakamála og þessir munir gufa oftar en ekki upp í vörslum lögreglu og sakborningar gefast upp á að reyna að nálgast þessa muni að endingu. Þetta er því miður allt of algengt," sagði Páll Kristjánsson, lögmaður mannsins í samtali við kvöldfréttir.

Tölvutækjum og borvélum fargað af vangá

Í tölvupósti sem fréttastofa hefur undir höndum má sjá að annar skjólstæðingur Páls, í öðru og ótengdu máli, tapaði einnig munum sem hann segir hafa verið haldlagða í sakamálarannsókn fyrr á árinu.

Í tölvupóstinum, sem undirritaður er af fulltrúa hjá lögreglunni á höfuðborgarsvæðinu segir að munirnir hafi ekki verið á sínum stað þegar að því kom að sækja þá. Leitað hafi verið á öllum mögulegum stöðum, en þeim virðist því miður hafa verið fargað af vangá. 

Samkvæmt fylgiskjali var m.a. um að ræða tölvutæki, borvélar, sverðsög, slípirokk, hjólsög o.fl. Páll segir skjólstæðing sinn ætla að leita réttar síns vegna málsins.Í skriflegu svari sem fréttastofu barst vegna umfjöllunar um Strawberries málið í gær kemur m.a. fram að mál sem þessi heyri til algjörrar undantekningar hjá lögreglu. Í því máli virðist munirnir aldrei hafa borist í munavörslu og verklagsreglum ekki verið fylgt. Í framhaldinu hafi verið ráðist í heildarúttekt og verklagsreglum um haldlagningu muna verið breytt. Enn hafa hins vegar ekki borist svör við fyrirspurn um hvaða breytingar voru gerðar á verklagsreglum og hvernig þær eru nú.