Enski boltinn

Enska úrvalsdeildin hafnaði VAR: „Mjög slæm ákvörðun“

Anton Ingi Leifsson skrifar
Wenger þungt hugsi.
Wenger þungt hugsi. vísir/afp

Arsene Wenger, stjóri Arsenal, segir að ákvörðun stjórnar ensku úrvalsdeildarinnar að taka ekki upp VAR á næstu leiktíð sé virkilega slæm ákvörðun.

„Því miður hefur úrvalsdeildin ákveðið aftur taka ekki upp VAR (myndbands-aðstoðardómara) og mér finnst persónulega það vera mjög, mjög slæm ákvörðun,” sagði Wenger eftir tapið gegn Newcastle í dag.

„Ég vildi fá VAR því úrvalsdeildin var stofnuð af fólki sem hafði haldið áfram þróuninni og það vildi vera fremsta deildin í Evrópu. Það virkaði. Unga kynslóðin þekkir þetta og annarsstaðar í heiminum gætu deildir tekið fram úr okkur vegna þessa.”

„Við erum á eftir heiminum og allir stóru leikirnir sem hafa ráðist á mistökum, það hefði verið hægt að koma í veg fyrir það með VAR. Til að mynda í Meistaradeildinni milli City og LIverpool.”

VAR-tæknin var notuð í enska bikarnum og deildarbikarnum á þessu tímabili við litla hrifningu flestra enda voru meðal annars teknar rangar ákvarðanir þegar tæknin var notuð.

Fólki finnst einnig leikurinn stöðvast í of langan tíma þegar tæknin er notuð svo það eru mismunandi sjónarhorn á þessari nýjustu tækni fótboltans.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira