Ölvaður maður tók kettling í gíslingu

Lögreglan á Suðurnesjum var í fyrrinótt kvödd að húsnæði í Keflavík þar sem ölvaður karlmaður hafði stolið kettlingi.

Hafði maðurinn komin inn í herbergi til kattaeigandans til að fá að sjá kettlinga sem þar voru. Sá fyrrnefndi fékk að halda á einum kettlingnum en gerði sér þá lítið fyrir og fór með hann inn í annað herbergi og neitaði að afhenda hann aftur, að því er segir í tilkynningu frá lögreglunni á Suðurnesjum.

Kattaeigandinn hafði samband við lögreglu sem mætti á staðinn og skarst í leikinn. Sá ölvaði brást reiður við afskiptunum en afhenti lögreglumönnum þó litlu kisuna.

Hann hélt áfram að sýna ógnandi hegðun og fór ekki að fyrirmælum lögreglu sem á endanum handtók hann og færði á lögreglustöð.