Bílar

Bílasala í janúar jókst um 29,2%

Finnur Thorlacius skrifar
Volvo XC90, en Volvo bílar frá Brimborg seldust í óvenju miklu magni í janúar.
Volvo XC90, en Volvo bílar frá Brimborg seldust í óvenju miklu magni í janúar.

Áfram gengur bílasala vel hér á landi og nýja árið byrjar með krafti og 29,2% aukningi á milli ára í janúar. Salan náði 1.810 bílum en var 1.402 bílar í fyrra. Söluhæsta umboðið sem fyrr var BL með 437 selda bíla og 8,4% aukningu á milli ára. Næst þar á eftir kom Toyota með 374 selda bíla og 42,7% vöxt og þriðja söluhæsta umboðið var Brimborg með 366 selda bíla og 73,5% vöxt.

Í því fjórða var Hekla með 299 bíla og 80,1% vöxt og svo Askja með 166 seldan bíl, en 27,5% samdrátt á milli ára. Markaðshlutdeild umboðanna eftir þennan fyrsta mánuð ársins er eftirfarandi: BL 24,1%, Toyota 20,7%, Brimborg 20,2%, Hekla 16,5% og Askja 9,2%. Ekkert annað umboð nær yfir 3,4% markaðshlutdeild, en Suzuki er með slíka hlutdeild eftir þennan fyrsta mánuð.

Volvo var stærsta lúxusbílamerkið og seldust 55 Volvo bílar í janúar. Jókst sala þeirra um 162% milli ára og er hlutdeild Volvo í janúar mánuði 27,4% af lúxusbílamarkaðnum. Næst þar á eftir kom Land Rover með 39 selda bíla, Audi með 37, BMW 26, Mercedes Benz 23, Lexus 9, Porsche 7, Jaguar 4 og Tesla 1.



Athugið. Allar athugasemdir eru á ábyrgð þeirra er þær rita. Vísir hvetur lesendur til að halda sig við málefnalega umræðu. Einnig áskilur Vísir sér rétt til að fjarlægja ærumeiðandi eða ósæmilegar athugasemdir og ummæli þeirra sem tjá sig ekki undir eigin nafni.

Fleiri fréttir

Sjá meira